Si Osmeña nga una nang mipadayag nga walay interes nga motambong sa himuong pagproklamar ni Presidente Gloria Arroyo sa mga kandidato pagka-senador sa administrasyon nakahukom nga motambong sa maong kalihukan aron ipakita sa presidente ang iyang presensya.
Si Osmeña nga milarga paingon sa Manila kagahapon sa alas 3:00 sa hapon aron motambong sa awarding nga himuon didto sa Manila Hotel gitakdang moabot dinhi sa Sugbu karong buntag alang sa maong kalihukan.
Hinuon giklaro sa mayor nga wala pa sila makahukom kun si kinsa ang mga kandidato sa Unity Team ang ilang suportahan sa umaabot piniliay.
Una nang gipadayag ni Osmeña nga kadtong mga politiko nga dili pabor sa tinguhang pagbahinbahin sa probinsya sa Sugbo ang ilang suportahan.
Nasayran nga gibalikbalik na og pahibalo ni Osmeña nga pagkakaron bugtong sila si kanhi Senador Loren Legarda sa United Opposition (UNO) ug si Ilocos Sur Governor Luis Chavit Singson ang iyang nahukman nga suportahan ang kandidatura.
Giangkon ni Osmeña nga duna siyay utang kabubut-on nila ni Legarda ug Singson tungod kay mao lang kini ang mipatim-aw nga mga guest sa iyang gipahigayon nga youth forum niadtong tuig 2001 dihang mibalik siya og lansar pagka-Mayor atbang ni kanhi Mayor Alvin Garcia bisan pa man og gipugngan kini sa iyang mga kontra sa partido.