Tigas sa La Guerta nasikop

Usa ka tigas sa La Guerta, Lahug ug wanted sa kasong pagpanulis nadakpan sa mga sakop sa Theft and Robbery Section ug Vice Control Section sa Cebu City Police Office human kini ireklamong nagbahas-bahas diha sa sitio Tarcom sa La Guerta, Lahug niadtong milabay'ng gabii.

Ang gidakop giilang si Alfred Maramara Vevora,23, dunay mga alyas nga Abay Perla ug Abay-abay kinsa residente sa maong dapit human kini maaktuhing nagsukbit og usa ka kalibre .38 paltik nga revolver ug may lima ka buhing bala ingon man usa ka indian pana nga may duha ka uhas.

Matud pang Sr.Inspector Alexis Relado, hepe sa TRS nga nakadawat sila og tawag gikan sa mga residente sa maong dapit kabahin sa tawong nagbahas sa ilang dapit nga may dalang armas.

Ang grupo sa TRS, VCS inubanan sa Criminal Investigation and Intelligence Branch daling misusi sa dapit ug nakit-an si Vevora apan ang suspek wala dayon motahan ug midagan palayo apan naabtan kini sa mga polis.

Nakuha diha sa iyang hawak ang maong armas ug ang Indian pana.

Matud pang Sr.Inspector Michael Anthony Bastes, deputy chief sa TRS nga si Vevora dunay kasong pagpanulis niadtong 2003 diin duna na kini warrant of arrest nga giluwatan sa sala ni RTC branch 14 Judge Rafael Yrastorza ug may piyansang P20 mil.

Matud pang Bastes nga nakadawat sila og impormasyon nga si Vevora apil sa grupo sa pagtulis ug pagpatay sa manager sa bangko niadtong milabay'ng tuig.

Si Vevora sa pakighinabi sa mga tigbalita kagahapon mihimakak nga siya badlungon sa ilang lugar ug maong nagdala-dala kini og armas gumikan kay dunay mga kaaway ang iyang mga higala sa pikas sitio nga miapil kaniya og dumot.

Samtang giangkon usab niyang napriso siya sa Bagong Buhay Rehabilitation Center niadtong 2002 tungod sa kaso sa drogas ug paghupot og armas.