Kandidato sa Lapu gitagak sa line-up

Usa ka kandidato sa grupo ni Bise Mayor Norma Patalinghug sa Lapu-Lapu ang gitangtang gumikan sa kakuwangan sa iyang mga papeles nga magprobar nga kini residente sa dakbayan sa Lapu-Lapu.

Atol sa pakighinabi sa Banat News kang Patalinghug, kini mibutyag nga iyang gipapas o gitangtang sa listahan sa iyang mga konsehal si Undo Mantilla nga usa ka sakop sa media nga maoy giduso ni Mayor Thadeo Ouano ngadto kaniya.

Matud pa ni Patalinghug nga kuwang ang mga papeles nga magpamatuod nga si Mantilla residente sa dakbayan sa Lapu-Lapu hinungdan nga iya kining giwagtang sa line up sa mga konsehal sa dakbayan sa Lapulapu.

Gumikan niini, si Mantilla gihulipan ni Earnest Luke Weigel nga maoy bag-ong kandidato sa pagkakonsehal sa habig ni Patalinghug.

Si Earnest Luke Weigel nga naila sa angga nga Boboy anak ni kanhi Mayor Earnest Weigel Jr. nga mitaliwan na sa laing kalibutan ug ang inahan niini nga si Pie Weigel maoy midagan pagka-mayor sa 2004 apan napakyas kini sa maong piniliay batok sa tandem ni Mayor Arturo Radaza ug Norma Patalinghug.

Si Earnest Luke Weigel nahimong ex-officio member sa konseho sa Lapu-Lapu sa milabay'ng mga tuig human kini maoy napiling presidente sa ABC sa dakbayan sa Lapu-lapu.