P2.5B circumferential road batok trapiko tukoron - CH

Makig-alayon ang kagamhanan sa siyudad sa Sugbo ngadto sa Japan Bankers for International Cooperation (JBIC) aron ma-release na ang P2.5 bilyones nga pundo alang sa circumferential road nga tukoron dinhi sa dakbayan nga gitumong aron pagsulbad sa nagkagrabe nga suliran sa trapiko.

Gibutyag ni Engr. Paul Villarete, hepe sa Planning and Development nga niadto pang tuig 1997 giaprobahan sa National Economic Development Authority (NEDA) ang pagtukod sa maong halapad nga kalsada gikan sa barangay Quiot, Pardo nga motadlas paingon sa Banawa, Guadalupe, Kalunasan, Capitol Site, Opra, ngadto na sa Marco Polo sa Busay ug adto mogawas sa Foodland sa Banilad.

Apan wala kini ikapatuman hangtod karon tungod kay walay igong pundo nga magamit sa implementasyon niining maong proyektoha.

Matud ni Villarete namugna kining maong proyekto tungod kay pagpangandam kini sa nagkagrabe nga suliran sa trapiko dinhi sa dakbayan sa umaabot nga mga katuigan tungod sa nagpadayon nga pagdaghan sa mga sakyanan apan minus ra kaayo ang mga expansion sa kadalanan.

Hinuon nabalaka si Villarete nga posibling magkulang pa ang maong gahin nga P2.5 bilyones gumikan kay kaniadto pa kini og pagkakaron nagpadayon ang pagsaka sa presyo sa mga palaliton.