Barko sa Gothong nasunog

Naugdaw ang tulo ka andana sa atubangang bahin sa usa ka barkong gibaradero diha sa Gothong Private Wharf sa Pier 7 kagahapon sa buntag diin milanat og pipila ka mga oras una pa kini hingpit nga napawong.

Ang maong barko mao ang MV Manila Bay 1 nga gipanag-iya sa Gothong Shipping Lines nga dunay gibug-atong 9,000 gross tons nga magbiyahian og Butuan, Cebu ug Manila.

Ang sunog nagsugod alas 10:43 ug milanat kini og upat ka oras ug diyes minutos una kini napawong. Gibana-banang P2.5 milyones ang danyos base sa pagsusi sa BFP.

Unang miresponde mao ang Mandaue City Bureau of Fire Protection ug giabagan sa mga bombero sa Cebu City, Lapu-Lapu City ug Filipino-Chinese Fire Brigade ug Emergency Rescue Unit Foundation.

Wala hinuon sila maglisod og tubig nga ibomba sanglit nigamit na sila og portable pump ug mikuha sa ilang suplay gikan sa dagat.

Mitabang usab og pawong sa kalayo ang duha ka tugboat sa Gothong ingon man usa ka barko sa Philippine Navy nga BRP Apolinario Mabini, usa ka patrol craft ug usa ka barko sa Philippine Coastguard gamit ang kaugalingon nilang fire fighting crew.

Miabot usab ang dul-an 30 ka mga sakop sa fire fighting crew USS Blue Ridge ang command ship sa US Seventh Fleet nga kasamtangang nag-angkorahe diha sa may baba sa Mactan Channel.

Ang USS Blue Ridge miabot niadtong Domingo sa hapon gikan sa Manila alang sa humanitarian mission sa tulo ka dagkong siyudad sa Pilipinas. Ang mga Amerikano luwan sa usa ka speedboat dala ang ilang mga portable pumps ug breathing apparatus atol sa overhauling operation.

Giisa ni Mandaue City fire marshal, Oscar Mayol ngadto sa general alarm ang sunog tungod sa kapeligro niini nga masunog ang tibuok barko.

Dunay daghang mga forty-footer nga mga container vans diha sa sulod sa cargo hold sa maong barko ang daling gipagawas aron makasulod usab ang mga firetrucks.

Sumala pa ni Mandaue City BFP, duty fire investigator SFO4 Jose Laureto nga nagsugod ang kalayo diha sa gi-cutting nga salog sa ikatulong deck sa barko, diin wala mabantaying ang tinagak nga baga adto nahagbong sa gipundok nga mga beddings sa tourist deck sa ikaduhang andana.

"Naay nag-cutting sa sawog sa third level unya diha sa second floor naay mga gipundok nga mga foam sa tourist deck, wala may nakabantay unya pagkakita nila ulahi na," asoy pang Laureto.

Si Atty. Francisco Mejares, legal counsel sa Gothong Shipping Lines sa pakighinabi sa mga tigbalita nagkanayon nga kapin usa ka semana nang wala mobiyahe ang maong barko sanglit naka-schedule kini nga ibaradero alang sa regular nga repairs sa matag duha ka tuig.

"Talagang accidental fire, kase may nagtatrabaho sa taas tapos may foam sa baba, hindi yata nila nakontrol," asoy pang Sr.Supt. Cornelio Salinas, ang hepe sa PNP Maritime-7 sa pakighinabi sa Banat News diha sa fire scene.

Samtang si Engineer Marlon Martin, ang gipadalang maritime safety inspector sa Marina-7 sa wharf mitug-an nga dunay imbestigasyon nga himuon ang ilang buhatan kabahin niini aron di na masubli ang susamang aksidente.