30 ka furniture manufacturers nanira

Naghinayhinay nag pamutos karon ang kapin 30 ka mga negosyante'g muweblas sa Cebu aron manirado sa ilang patigayon kay dili na kaantos sa kadaghan sa ilang kompetensya ug ang pagsawom sa dolyar batok peso.

Gumikan niini ang presidente sa Cebu Furniture Industries Foundation Inc. CFIF Michael Basubas miangkon nga ning 35 ka mga kompaniya nga manak-op sa negosyo may kaping 2,000 ka mga trabahante ang makolban usab og kaldero.

Gitumbok ni Basubas nga dugay na silang nag-ilaid sa kalisod sa pagpalusot sa ilang mga produkto ngadto sa gawas gumikan kay daghan na kaayo karong nasud nga nakasundog ning maong negosyo nga naggikan dinhi sa Pilipinas.

Pipila sa kusog kaayo karong milambo mao ang Vietnam ug ang China kansang mga negosyante nanghuwam o mipatrabaho og mga "designer" nga Pilipino, hangtod nga dihang nakakat-on na ang ilang mga nasyonal didto, gipapauli ang mga panday nga Pilipino ug sila nay nagpalambo sa industriya.

Midugang si Basubas nga ning gitawag nga "survival of the fittest" nilang kahimtang, ang uban dili na gyud kaagwanta ilabi na ning laraw nga pasakaan na usab ang suholan sa mga trabahante.

Tungod niini miingon si Basubas nga wala na silay mahimo aron pugngan ang ilang mga kaubanan sa negosyo, sanglit nakahukom na kini sa pagbiya sa pamatigayon sa furniture.

Bisan wala niya ibutyag ang mga ngalan sa maong mga negosyante, apan makita kini diha sa dapit sa Mandaue City, Talisay, Lapu-Lapu ug uban pang mga lugar diin kon ihapon ang mitahan na sa ilang kaugalingon ug mipadayag nga hingpit na silang moatras sa natad sa negosyong furniture, molanat gyud og 35 ka kompaniya ang tanan.

Miingon si Basubas nga kon magpadayon ang maong sitwasyon, hayan pipila nalang unya ang magpabilin sa maong negosyo.