Sugbuak bills buhi pa - Gullas

Buhi pa ang tulo ka nailang "Sugbuak Bills" sa Ubos Bay-Balauranan. Kini ang giklaro ni Kongresista Eduardo Gullas sa iyang pagpakigpulong sa paglusad sa One Cebu Party kagahapon.

"It's not dead," nagkanayun si Gullas sukwahi sa pamahayag ni Kongresista Antonio Cuenco nga patay na ang maong mga balaudnon tumong sa pagbuak-buak sa lalawigan sa Sugbo.

Gipasabot ni Gullas nga apil pa sa calendar of business alang sa plenary sa Ubos Bay-Balauranan ang tulo ka balaudnon nga giduso nilang Kongresista Simeon Kintanar, Antonio Yapha Jr. ug Clavel Asas-Martinez.

Karong Pebrero 19, nagpatawag og special session si Presidente Gloria Macapagal Arroyo aron pag-aprobar sa mga committee report sa bicameral conference committee ilabi na sa mga mahinungdanong balaudnon.

Matud pa ni Gullas nga ang mga balaudnon ra nga nalakip sa proklamasyon sa Presidente ang matuki.

Apan mahimo nga ang majority leader makasingit sa ubang balaudnon maong bantayanan ang maong pamaagi sumala pa ni Gullas.

"We have to be on guard," matud pa ni Gullas.

Gawas sa special session, matud pa ni Gullas nga duna pa sila'y sesyon sulod sa lima ka adlaw sa buwan sa Hunyo sa dili pa mapupos ang termino sa kasamtangang mga piniling opisyal human sa eleksiyon karong Mayo.

Molingkod ang mga mapili karong eleksiyon unya sa Hulyo 1.