Ang mga biktima nag-inom sa kamalig daplin sa baybayon ug diha pod nagluto sa boriring. Gituohan nga wala matarong og limpyo ang boriring sa wala pa kini lutoa.
Ang nangamatay mao si Mario Villacarlos, 28 , Arnel Fuentes, 35, Rommel Alolor, 25, ug Benvienido Maru, 55, pulos mga ulitawo ug residente sa nahisgutang lugar.
Samtang ang padayon pang giatiman sa mga doctor sa Bantayan District Hospital mao si Felicismo Espina, 59, Salvador, 53, ug magtiayong Delia, 53, ug Antonio Ramirez, 60, ug John Carlo Alolor, 8 anyos.
Segun sa report sa kapolisan niadtong tungora ang mga biktima nag-inom ug pulos na mga lango sa ilimnong makahubog.
Si Rafael Rosales, umagad sa magtiayong Ramirez gikan nanagat ug nakakuha og boriring nga mitimbang og tulo ka kilo.
Nakahukom ang mga biktima nga palimpiyohan ni Wilfredo Makoy kinsa hubog nang daan aron ilang himuong "pulotan," ug si Delia maoy niluto niini.
Maisip nga gisuwerte si Makoy kay mao lang ang wala makaapil og kaon kay nakatulog human og limpyo gumikan sa kahubog.
Si PO2 Wilfredo Bonado nga nahinabi sa Banat News niingon milanat og tulo ka oras ang milabay ang mga biktima nakamatngon sa ilang pagpanakit sa tiyan ug nagsuka-suka.
Si Villacarlos, pasado alas 7 sa gabii nakabsan gyud sa kinabuhi sulod sa ilang panimalay ug nilagom.
Daling gipangdala ang mga kauban ni Villacarlos sa District hospital apan si Benvienido Maru gideklarar sa mga doktor nga patay na pag-abot sa nahisgutang tambalanan.
Pipila ka gutlo ang nakalabay nakabsan sa kinabuhi ang duha nga si Arnel ug Romel Alolor.
"Kadaghan naman kuno sila nagluto aning boriring dili lang kay karun pa, duna may kuhaon ana gud nga ugat-ugat, bihod ug apdo, matud pa nila kun maadlipan sa kutsilyo ang bihod kung maglimpiyo ilabay nalang nila" dugang asoy ni Bonado.
Si Levi Negapatan, nurse on duty sa Bantayan District Hospital nga nahinabi sa Banat News kagahapon mideklarar nga luwas na sa makuyaw nga kahimtang ang ubang mga biktima.
Si Espina ang gibalhin sa tambalanan sa dakbayan sa Sugbu kay kagustuhan usab kini sa mga kabanay kay hubakon tungod sa kabalaka nga mokumplikar ang iyang gikaon nga boriring.