Lalaki kuhaag 'shabu'

Usa ka 28 anyos nga lalaki ang gidakop human kini makuhai og pito ka paketeng may sulod nga gidudahang shabu atol sa gihimong checkpoint sa mga sakop sa Criminal Investigation and Intelligence Branch sa Cebu City Police Office kagahapon sa udto.

Ang nadakpan giilang si Elmo Pegarido,residente sa sitio Sacris, Banilad dakbayan sa Mandaue gikatahong kadudahan kaayo ang lihok dihang gipakanaog sa mga nag-checkpoint nga polis diha sa dalan Archbishop Reyes sa Banilad.

Ang nangulo sa maong checkpoint mao si PO3 Gerard Cui uban sa mga sakop sa Field Training Program aron pagpamenus sa kriminalidad sa maong dapit.

Matud pa sa mga polis sakay og PUJ nga padulong sa Talamban si Pegarido niadtong tungura ug dihang gipakanaog ug girekisa nakita diha sa iyang bulsa ang maong mga paketeng shabu.

Matud pa sa suspek ngadto sa mga tigbalita nga gisugo lang siya sa pagpamalit sa maong drugas diha sa Barracks sa Bario Luz nga nagkantidad og P1,500.

Si Sr.Insp.Wilbert Parilla sa CIIB nagkanayon nga posibleng usbon kini og repack ug ibaligya usab kini ni Pegarido diha sa iyang barangay.