CICC i-promote sa gawas nasud

Gipasalig sa kadagkoan sa Department of Tourism sa nasud nga motabang kini pag-promote sa Sugbo isip international convention haven pinaagi sa gitukod nga Cebu International Convention Center.

Matud pa ni DOT-7 Director Patria Aurora Roa, nga kini ang pasalig ni Secretary Joseph Ace Durano human sa kalampusan sa pagpahigayun sa 12th Association of Southeast Asian Nations Summit sa CICC sa niaging buwan.

Matud pa ni Roa nga unom ka dagkung kalihukan sa DOT ang gikatakda nga ipahigayun sa CICC karong tuiga nga sagad untang ipahigayun sa kauluhan.

Kini naglangkub sa 'Kalakbay Awards,' nga sagad himoon sa Malacañang Palace o kaha sa Philippine International Convention Center sa Manila, Travel Exchange, Tourism Jobs Fair karong Marso 28 hangtud 31 ug ang Philippine Travel Mart nga sagad ipahigayun sa Mega Mall sa Ortigas, Manila.

Matud pa ni Roa nga gawas sa nahisgutang mga kalihukan, daghan pang langyaw'ng ug pribadong mga organizers ang nipadayag sa tinguha nga mogamit sa CICC.

Nasayran nga gihingpit pa karon sa kagamhanan sa lalawigan sa Sugbo ug dakbayan sa Mandaue ang pagpadagan sa CICC ug gitukod ang usa ka management board nga maoy mohan-ay ug mopatuman sa lagda sa pagpagamit sa CICC.