Sulti ni Sonny O gi-deny ni Radaza

Gihimakak ni Lapu-Lapu City Mayor Arturo Radaza ang pamahayag sa iyang alalay nga si kanhi Senador Sonny Osmeña.

Si Osmeña namahayag nga si Radaza ang nihangyo kaniya nga dili padaganon sa pagka-senador ug padaganon siya sa pagka-gobernador atbang kang Gob. Gwen Garcia.

"Wala man ko magsulti ana oy," sumala pa ni Radaza nga gitapuk-an sa mga sakop sa media sa dihang nigawas siya sa buhatan sa gobernador.

Si Radaza, sakop sa Nationalist People's Coalition, nakigtagbo kang Garcia sa niaging adlaw apan ang duha parehong nagdumili pagbutyag sa ilang gihisgutan labot sa politika.

Matud pa ni Radaza nga gipatawag siya sa gobernador labot sa ihatag sa Kapitolyo nga police jeep sama sa gipanghatag sa kapolisan sa kalungsuran ug sa ubang syudad gawas sa dakbayan sa Lapu-Lapu nga wala mahatagi.

Labaw pa nga gihimakak ni Radaza ang pahibawo ni kanhi Kongresista Celestino "Junie" Martinez nga siya ang modagan sa pagka sakop sa hunta probinsiyal ubos sa ilang grupo.

"Wala ko kahibawo anang dapita," nagkanayun si Radaza.

Sayo niini, si Osmeña gikataho nga nakigtagbo sa iyang mga alalay sa Sugbo lakip na ni Radaza aron pagpangita og kandidato sa pagka-gobernador nga isakbang kang Garcia.

Apan si Osmeña hugot na nga dili modagan sa pagka-gobernador human siya nalakip sa linya sa mga kandidato sa pagka-senador ubos sa United Opposition.