Expired ang giapod nga tambal

Usa ka 34-anyos nga babaye kinsa residente sa San Lorenzo Barangay Lawaan II dakbayan sa Talisay mipasangil nga expired na ang gihatag nga tambal ngadto kaniya sa volunteer sa medical mission nga gipahigayon ni Konsehal Sergio "Serie" Restauro niadtong Biyernes diha sa atubangan sa city hall.

Si Lougisala "Dylou" Aroa usa ka disable nagpuyo sa nahisgutang lugar mibutyag kagahapon sa Banat News nga niadto pang Marso 2006 na-expired ang "Actos" nga tabletas tambal sa diabetis nga gihatag kaniya hinungdan nga iyaha kining gipauli.

Human sa pagpaeksamin ni Aroa ngadto ni Restauro pag-uli niini sa ilang balay moinom na unta siya sa tambal apan swerte kay nabasahan kini sa iyang amiga nga expired na diay ang tambal nga gihatag.

Matud ni Aroa nga gisugo niya ang iyang igsoon nga si Grethel sa pagpauli sa maong tambal diha sa buhatan ni Restauro sa city hall.

Si Aroa mipasangil nga gipasa-pasa si Grethel pag-abot diha sa buhatan ni Restauro ug hangtud naatubang kini sa usa ka babaye nga mestisa kinsa arogante kaayong mitubag sa pangutana ni Grethel kung pila ka adlaw ang extension sa tambal nga pwede pa kining matomar.

Si Restauro sa iyang bahin nagkanayon nga igo lang siyang miayuda sa maong medical mission ug ang iyang higala nga American national nga si Cheryl Hutchsin ang nagdala sa mga tambal para ipanghatag sa mga tawo.