Beat patrols sa CCPO palig-unon foot patrols ilusad sa Lunes

Nakigtagbo ang hepe sa Cebu City Police Office ngadto sa tanang mga hepe sa mga police stations ug special units kagahapon sa hapon alang sa planong realignment sa mga police beat patrols ug paghimo og night watch foot patrol sa dakbayan.

Kini may labot sa sunod-sunod nga nahitabong pagpanulis sa mga establisamento dinhi sa dakbayan sulod palang sa kapin usa ka bulan gikan sa paglingkod ni Sr.Supt. Patrocinio Comendador.

Sukad niadtong Enero gitulis ang Yusay Finance Corporation sa dalan Gorordo sa Camputhaw gisunod ang People's Cooperative sa Talamban, sunod ang Dranix Distributors Inc. sa dalan Tagunol sa Basak-San Nicolas diin gipatay ang usa ka gwardiya ug nadala ang gibana-banang tunga ngadto sa usa ka milyong salapi.

Ingon man ang Asian Spirit Ticketing Office diha ra gihapon sa naasoy'ng dalan nga nadala ang kapin P100 mil nga halin niadtong semana ug ang gitumbok nga duha ka tulisan nagpailang mga sakop sa vigilante.

Nagduda karon ang kapolisan nga posibleng usa ra ang mitulis sa Asian Spirit ug ang gitulis nga bangko kagahapon nga Anchor Savings Bank sanglit parehong nagpailang mga vigilante ug dunay mga silencers ang mga armas.

Ang night watch foot patrol ilusad karong Lunes ug langkuban kini sa pito ka mga teams gikan sa mga sakop sa Operations Section ug Service Security Group sila isuperbisar sa Operations Section apan ang CIIB maoy mopili kung asa sila i-deploy.

Matud pang Comendador sa Banat News himuon kini aron mapalig-on ang presensya sa kapolisan diha sa kadalanan bisan panahon sa kagabhion.

Samtang dunay usa ka dako og network nga ticketing office sa dakbayan ang gikatakdang makigtagbo kang Comendador aron palig-onon ang seguridad sa ilang mga negosyo.

Matud pang Comendador nga tukion nila kung unsaon pag-instalar sa ilang mga security alarm systems nga makonektado sa labing duol nga police station ug Mobile Patrol Group.

Giklaro hinuon ni Comendador nga dili garantiya nga di mapugngan ang mga tulisan sa maong mga security gadgets apan dako kini og ikatabang aron di nila sayon-sayonon ang pagtulis ug ingon man mas madaling makaresponde ang kapolisan.

"Security is just to delay their entrance, there is no such thing as impregnable pero dako ni siya og matabang sa atoa, bisan I-cut off pa nila ang telephone lines makakontak gihapon sila sa atoa," asoy pang Comendador.

Samtang subling gipahinumdom ni Comendador sa mga magpapatigayon ug ilang mga kawani sa paghinumdom sa mga numero sa police hotline nga 166, Patrol 117 ug ang text a crime nga 09214931616.