Birthday nahimong dugoon

Nahimong dugoon ang birthday party sa Sitio Kaisid, Marigondon, Lapu-Lapu human nga usa ka paryente sa nagsaulog gidunggab sa iyang ig-agaw niadtong miaging gabii.

Si Giovani Espinosa Ponce, 36, minyo, ug lumad sa maong dapit, samtang ang gitumbok nga nagdunggab kaniya mao ang iyang ig-agaw nga nailang si Raul Espinosa Negro.

Base sa imbestigasyon ni SPO2 Rolito Jumao-as sa Homicide Section sa Lapu-Lapu nasayran nga si Ponce ug Negro mitambong sa birthday party sa ilang bayaw sa susamang dapit ug nag-inom pa atol sa maong okasyon.

Pipila ka gutlo mitumaw ang panaglalis sa duha hangtod miabot sa pagpanunggab.

Si Ponce nga samdan sa tuong bukton gidala sa Mactan Doctor's Hospital ug luwas na sa makuyaw'ng kahimtang.

Si Negro dali ra kaayo nga nakaipsot sa mga sakop sa kapolisan atol sa pagresponde niini apan ang kutsilyo nga gigamit ni Negro nahibilin ug gidala kini sa buhatan sa kapolisan sa dakbayan sa Lapu-Lapu isip ebidensiya.