Kapitan mitahan sa iyang kaugalingon sa polis

Natingkagol diha sa Sibonga police detention cell ang usa ka kanhi Barangay kapitan human kini midunggab, patay sa usa ka 39-anyos nga lalaki niadtong Sabado sa kadlawon diha sa Barangay Candaguit lungsod sa Sibonga.

Si Franklin Lopez alyas "Joel" usa ka free lance driver ug residente sa maong lugar ang gidunggab ni Buenaventura Abella 41, kanhi kapitan sa nahisgutang Barangay.

Si PO2 Antonio Sanchez deputy investigator ug desk officer sa kapolisan sa Sibonga nagkanayon nga si Lopez naagi sa grupo ni Abella kinsa nag-inom diha daplin sa karsada sa lugar nga nahitaboan.

Si Lopez gitawag sa grupo ni Abella para mosalmot sa ilang inom apan taliwala sa ilang panag-inom nahitabo ang panaglalis tali sa suspetsado ug sa usa ka "Randy".

Misuway sa pag-ulang si Lopez nila ni Abella ug Randy apan ang biktima na man hinoon ang giatubang ug gidunggab sa suspetsado.

Nakaangkon og usa ka samad dinunggaban sa iyang tuong dughan si Lopez ug dali kining gidala diha sa Deiperine Medical Clinic apan tungod sa kahimtang niini gibalhin diha sa Vicente Sotto Memorial Medical Center niining dakbayan apan pila ka oras ang milabay namatay gyud ang biktima.

Si Abella miikyas human sa maong hitabo apan pagka alas 9:00 sa buntag sa maong adlaw boluntaryo kining mitahan sa iyang kaugalingon sa kapolisan.

Si Abella giubanan ni SPO4 Sofronio Boy Caballes polis nga nadestino diha sa lungsod sa Carcar kinsa nagpuyo diha sa Barangay Mangyan duol nga Barangay sa Candaguit.

Si Sanchez midungag nga si Abella nakaserbisyo isip Barangay kapitan sulod sa napulo ka tuig diha sa ilang barangay diin ang kataposang termino niini niadtong tuig 2002.