Ang namatay diha na sa tambalanan giilang si Zion Gabini, 26, nagpuyo sa maong dapit kinsa kasamtangang natulog sa iyang lawak dihang gidaro sa Isuzu Big Horn nga may plakang YCU-284.
Una pa maigo ang panimalay sa biktima, duna nay gidasmagang laing duha ka mga tawo ang sakyanan ug giilang sila si Armando Moreno, 47, ug Exaltacion Son, 60 kinsa kasamtangang nagbarog diha daplin sa dalan.
Sa imbestigasyon ni SPO1 Dionesto Galo sa Traffic Group sa Cebu City Police Office, ang sakyanan gimaneho ni Maria Erla Aranas Cabatingan, 46, taga Poblacion, Liloan.
Nasuta nga si Cabatingan giingong nagpaabot niadtong tungora sa iyang higala kinsa maoy mopuli og maneho niadtong tungora samtang nag-andar pa ang makina niini.
Gikatahong mibalhin na og lingkod si Cabatingan sa pikas lingkuranan aron makalingkod ang iyang higalang gipaabot apan aksidente niining natamakan ang accelerator (gasolinador) sa sakyanan hinungdan nga kalit kining misutoy.
Nasuta sa kapolisan nga ang maong sakyanan automatic maong miabante nga wala nay kontrol gikan sa drayber nga na-out balance na usab sa sulod ug naigo ang usa ka taxi nga gimaneho ni Tito Gayamot Dairo, 40.
Tungod sa kakusog sa dagan sa Isuzu Big Horn naigo usab niini sila si Son ug Moreno diha sa dalan hinungdan sa ilang pagkaangkon og daghang kadaut sa kalawasan. Ang duha dali usab nga nadala sa tambalanan.
Wala pa gihapon mabawi ni Cabatingan ang kontrol sa sakyanan ug milahos pa kini og dagan ug didto mibangga sa PUJ nga may plakang GVU-652 nga gimaneho ni Agustin Ocampo, 53, taga Mabolo diin naigo ug nabag-id diha sa tuong bahin sa luyo sa PUJ hangtud na sa iyang atubangan nga nakaingon sa pagbuto sa tuong pangunahang ligid sa PUJ.
Tungod sa kakusog sa pagbangga miliwag pa ngadto sa walang bahin sa kalsada ang Isuzu Big Horn ug didto gipunggit ang balay sa mga Gabini.
Si Gabini kinsa natulog sa iyang lawak niadtong tungura wala na makamatikod sa pagdasmag sa sakyanan ug daling gidala sa tambalanan apan dangtan og pila ka gutlo nakabsan kini og kinabuhi.
Diha na sa maong balay miungot ang sakyanan ug wala na makaabante ug napawong ra usab ang makina niini.
Si Cabatingan boluntaryo hinuong mitahan sa kapolisan ug gikatakdang pasakaan na og kaso ugmang adlawa.