Rama makigtagbo sa kadagkuan sa BFP-Mla

Suportado ni Mayor Tomas Osmeña ang laraw ni Bise mayor Michael Rama nga nagtinguhang molarga paingon sa Manila aron mangayo og dugang mga kagamitan didto sa Bureau of Fire Protection (BFP) aron magamit sa kabomberohan dinhi sa dakbayan sa Sugbo pagtubag og mga motumaw nga alarma sa sunog.

Nakita ni Rama ang problema sa kakulang sa kabomberohan dinhi sa dakbayan sa mga kagamitan niini pagsumpo sa sunog sama sa mga tag-as nga fire ladder ug mga fire trucks human motumaw ang dakong sunog sa Carbon niadtong milabay'ng kaadlawon nga miugdaw og 17 ka mga establisamento ug mitala og P3 milyones nga danyos.

Si Osmeña miangkon atol sa press conference kagahapong adlawa nga problema gyud sa kabomberohan dinhi sa dakbayan ang tag-as nga mga fire ladder nga makaabot sa mga tag-as nga edipisyo.

Matud sa mayor nga ang kasamtangang fire ladder nga gigamit karon sa kabomberohan dinhi sa dakbayan makasugakod lang kini ngadto sa tulo ngadto sa upat ka andana nga building.

Gibutyag ni Osmeña nga kun wala pa ang Chinese Volunteer Fire Brigade ug ang Emergency Rescue Unit (ERUF) hayan hapit na mahurot og kaugdaw ang mga dagkong establisamento dinhi sa dakbayan.

Sa gihimong pakisusi ni Osmeña ang fire ladder alang sa 10 ka andana nga edipisyo mokantidad kini og $1 milyon ug ang fire ladder sa 20-story building mokantidad og $2.2 milyones.