Kidney sa patay gibalhin sa pasyente malampuson

Malampuson ang Vicente Sotto Memorial Medical Center sa labing una sa nasud nga pagkuha sa kidney sa usa ka patay nga tawo aron ibalhin kini sa laing pasyente.

Usa ka 32 anyos nga lalake (ngalan gipugngan) ang nalandig sa maong tambalanan niadtong Enero 29, 2007 gumikan sa grabeng kadaut nga nahiaguman sa iyang ulo human naaksidenti sa motorsiklo.

Gideklarar sa Neurosurgery Department nga patay na ang utok sa pasyenti niadtong Enero 31, 2007.

Dali nga nangayo og permiso ang mga mananambal sa kabanay nga kuhaon ang kidney sa patay ug idonar ngadto sa pasyente nga nagkinahanglan niini.

Matud pa ni Dr. Alvin Roxas, transplant surgeon sa VSMMC, nga nilampus gyud sila sa pagkuha sa duha ka kidney sa patay sa maong adlaw ug gikatakda kini nga ibalhin sa duha ka pasyente nga dunay end-stage renal disease sa National Kidney Transplant Institute.

"This is the first time that we conducted an organ retrieval effort from a deceased donor in Cebu City," sumala pa ni Roxas.

Wala hinoon gibutyag ni Roxas ang kantidad, apan ilang gihinabangan ang tagtungod sa pagpalubong sa patay.

Ang VSMMC mao lang ang bugtong tambalanan sa Visayas nga gitugutan nga makapahigayun og transplant operation.

Ang operasyon giabagan sa mga sakop sa Human Organ Preservation Effort (HOPE) sa NKTI ug The Renal Disease Control Program sa DOH.

Plano karon sa DOH nga mabutangan og susama sa HOPE ug transplant coordinator ang VSMMC ug pagbutang og regional registry alang niadtong gustong modonar sa mga maayong parte sa lawas sa higayun nga mamatay na.