Balay sa taxi operator naugdaw; P800 mil danyos

Mikabat sa P800 mil ang gibanabanang danyos sa sunog nga nahitabo sa Sitio Kinalumsan, Gun-ob, Lapulapu kagahapon sa kaadlawon.

Ang naugdaw nga panimalay gipanag-iya ni Hilario Ramirez, tag-iya sa HR ug Light taxi nga nahimutang sa maong dapit.

Base sa imbestigasyon ni SFO1 Rodolfo Apa sa Lapulapu Fire department nasuta nga TV nga na-overheat ang hinungdan sa maong sunog. Ang TV nga nahimutang sa sala giingong maoy sinugdanan sa kalayo.

Matud pa ni Ramirez sa maong outlet nga nahimutangan sa TV didto usab nakasaksak ang ilang refrigerator hinungdan nga mi-overheat kini og dali nga midako ang kalayo sa maong panimalay.

Si Jenny Yuson, private nurse ni Ramirez nga kasamtangan usab nga stay-in sa maong panimalay nahiagum og first degree nga paso sa iyang palad ug tudlo.

Matud pa ni Yuson buot unta siya nga moluwas sa kabtangan ni Ramirez apan demalas kay usa ka init nga butang ang iyang nahikapan hinungdan sa paso ang iyang naangkon ug dali kini nga gidala sa Mactan Doctor's Hospital ug luwas na kini sa makuyaw'ng kahimtang.

Ang danyos nga P800 mil nagrepresentar sa kabtangan nga nahibilin sa panimalay ni Ramirez ug nahurot og kasunog.

Nadawat sa kabomberohan ang sunog 12:50 kagahapon sa kaadlawon ug gipaubos kini sa first alarm diin nakontrolar mga tres minutos.

Samtang sa Mandaue usa ka Marvin Caayon, 21, ulitawo nga lumad sa Tabuelan, Cebu gitumbok nga responsable sa sunog nga nahitabo sa Kimwa compound didto sa Sitio Buldozeran, Labogon, Mandaue.

Matud pa ni SFO1 Roy Garcia, imbestigador sa Mandaue City Fire Station nga mitubag sa iyang sugo sa lawas si Caayon sa usa ka kasagbutan diin duol kini sa mga nakapundong ligid.

Gumikan sa kadaghan sa lamok, midagkot kini og karton aron sa pag-abog sa mga lamok samtang kini milingkod ug mitubag sa sugo sa lawas.

Human sa maong sugo, nakalimtan ni Caayon ang karton nga nagsiga diin midakop kini sa nagtapok nga ligid hinungdan sa pag-ulbo sa kalayo niini.

Hinuon, matud pa ni Garcia nga walay angay nga kabalak-an ang maong sitwasyon gumikan kay layo ang compound sa mga kabalayan ug walay naangol sa maong insidente. - Bong Soriano ug Romeo Limpangog