Garand rifle, .38 paltik, mga bala nasakmit sa CIDG-7

Usa ka high powered firearm ug usa ka rebolber uban sa kapin usa ka gatos nga bala ang nasakmit sa Criminal Investigation and Detection Group 7 atol sa gihimong pagpangronda sa Campo 4 sa dakbayan sa Talisay sa milabay'ng gabii.

Ang gidakop giilang si Florencio Saballa, 55, residente sa nahisgutang barangay ug magtumoran og baboy diha sa Tabunok tungod sa paghupot sa maong mga armas nga walay lisensya. Giangkon niyang siya sakop sa anti-communist movement kaniadto.

Ang mga sakop sa CIDG7 gipangulohan ni Chief Inspector Fermin Armendares armado sa search warrant nga giluwatan ni RTC judge Branch 10 Soliver Peras tungod sa paghupot og armas.

Ang CID-Team mialirong sa balay ni Saballa pasado alas 9 na sa gabii base sa report armado og taas nga kalibre sa armas ang suspek.

Nakuha diha kang Saballa ang usa ka .30 caliber Winchester Garand rifle nga may dose ka clips nga bala ug extra nga 14 ka buhing bala nga mikabat sa 110 ka buhing bala ug duha ka basiyo, nakuhaan usab siya og usa ka kalibre 38 nga paltik nga may walo ka buhing bala.

Matud pang Derilo kabahin kini sa kampanya sa kapolisan sa paggukod sa mga private armed groups nunot niining umaabot nga eleksyon.

Si Saballa sa pakighinabi sa mga tigbalita miangkong duna siya'y gialagarang politiko nga kasamtangan karong naa sa posisyon sa dakbayan sa Talisay apan midumili kini sa pag-ila.

Miklaro hinuon siyang di siya bodyguard sa maong politiko kundili suporter ra ug tighatag og mga campaign leaflets kaniadto.

Si Derilo nagkanayon nga nakadawat ang CIDG ug reklamo kabahin sa giingong pagpangharas ni Saballa sa iyang mga silingan ilabi na kung kini mahubog giingong magpabuto kini og armas. Apan si Saballa mihimakak niini.

Samtang giangkon usab niyang nadawat niya ang maong armas niadto pang tuig 1984 atol nga init pa kaayo ang pagpangatake sa mga rebeldeng New Peoples Army.

Hinuon gitug-an ni Derilo nga posibleng di masakop sa Comelec Gun Ban ang pagkadakop kang Saballa sanglit wala kini dad-a sa suspek dihang siya naaresto sanglit diha na kini sa iyang balay nakuha.

Mipahibalo si Derilo ngadto sa mga tawong dunay mga armas lisensyado man o dili nga di magdala-dala niini sa gawas sa ilang panimalay kung walay Comelec exemptions.