'Incumbent politician' sa Cebu nag-organize og private army

Usa ka "incumbent politician" dinhi sa Sugbo giingong nag-organize og "private army' nga posibleng gamiton ang maong mga tawo sa iyang kampanya karong umaabot eleksyon karong bulan sa Mayo.

Kini ang nasayran sa Banat News kagahapon gikan ni Supt. Juanito Enguerra, hepe sa Provincial Investigation and Intelligence Branch (PIIB) sa Cebu Provincial Police Office.

Kini human makadawat og report si Enguerra niadtong Miyerkules gikan sa ilang intelligence community nga nagbase sa amihanang bahin sa Sugbo.

Ang maong politiko gituohang magpasubli sa iyang posisyon karong eleksyon sa Mayo.

Hinuon wala na mohatag og insaktong detalye si Enguerra kun asang dapita sa Sugbo nga dunay usa ka politiko nga nag organize og private army.

Apan giklaro ni Enguerra nga ang maong report iya pa kining gi-verify gani duna nay iyang tawo nga gipadala sa maong lugar aron susihon ug maniid kun tinuod ang maong impormasyon.

Tuyo ni Enguerra mahibaw-an mentras sayo pa ug layo pa usab ang piniliay aron mapugngan ug kapangitaan nila kini og pamaagi.

Hinuon matud ni Enguerra ang mga hepe sa tanang police station sa Sugbo iya nang gimanduan nga mohimo kanunay og checkpoints adlaw ug gabii sa ilang tagsatagsa ka area of responsibility. Kini base usab sa kamanduan nga iyang nadawat gikan ni Chief Supt. Silverio Alarcio Jr. sa Police Regional Office-7.

Dugang pa ni Enguerra sa higayon nga ilang mamatud-an nga tinuod ang maong report nga iyang nadawat nga dunay incumbent politician ang nag-organize og private army iya kini i-endosar ngadto sa buhatan sa Commission on Election.

Matud niya ang Comelec na maoy modisider kun unsa ang hukom nga ilang makab-ot nga maisip nga 'ground for disqualificaton' kana kun nalakapas sa patakaran sa piniliay.