17 ka tindahan hurot sa sunog, P3M danyos

Napulo'g pito ka mga establisamento sa mga dalan Lincoln, Plaridel ug Manalili diha sa may Carbon Market ang gilamoy sa sunog kagahapon sa kaadlawon nga midanyos og P3 milyones .

Sumala pa ni SFO2 Felix Romero ang fire investigator sa Cebu City Bureau of Fire Protection nga nagsugod ang sunog pasado alas 3:58 ug milanat pa og duha ka oras ug 20 minutos gikan pagsaka sa general alarm kini nakontrolar.

Base sa inisyal nga imbestigasyon giingong diha magsugod sa ground floor sa Cebu Classic Guitar nga gipanag-iya ni Maribel Aseron ang kalayo ug midukot ngadto sa ikatulong andana diin gibangan sa usa ka Taiwanese nga giingong nagpundo og mga pabuto.

Wala pa hinuon gyud matino kung giunsa pagsugod ang sunog sanglit matud pang Abendan sa pakighinabi sa Banat News nga ila gyung pawngon ang plangka matag manirado sila.

Nakugang usab ang mga tawo ug kabomberuhan dihang kalit nga nagpaka-paka ang butobuto gikan sa Ko Cua nga milanat og 30 minutos.

Ang nangaugdaw usab mao ang Cebu Guitar nga gipanag-iya sa ig-agaw ni Aseron nga si Lucila Abendan; Ko Cua Commercial; Pan de Rose Bakery; Cebu Ham Tat Trading; GO Marketing; Vision General Merchandise; Chua Yao Enterprise; KC Marketing; bodega sa Ongkingking sa dalan Lincoln; Cebu Sunrise and Premier Marketing; GGM Marketing; Nazareth Children Center; LC Remedios Store; JLY Shoe Center; Tiong Bee ug Cebu Kings Trading.

Sagad sa mga naugdaw ginama sa kahoy ug kaniadto pang panahon human sa Ikaduhang Gubat sa Kalibutan (1945-1950) natukod maong dali ra kaayong naugdaw ug piot usab kaayo ang agianan.

Ang alarma gisaka ni Cebu City Fire Marshal Sr. Supt. Fredelson Codilla ngadto sa general alarm, "Kay ato mang gitan-aw ang combustibility sa mga contents unya light materials ug kusog pa gyud ang hangin," asoy pa niini.

Ang tindahan ni Presidential Assistant for Central Visayas Felix Guanzon nga tupad sa Cebu Kings diha sa dalan Plaridel nga mao ang Cebu Champion Hardware Inc. diriyot usab maapil apan tungod sa firewall wala makalabang ang kalayo.

Si SFO2 Romero nagkanayon nga usa sa ilang nasinating problema mao nga walay kalutsan ang mga bombero pag-atraka tungod sa mga firewalls ug sa kainit na sa palibot.

Samtang nakasinati og dyutay'ng problema sa tubig gumikan kay gikatahong hinay ang pressure sa mga fire hydrants diha sa duol tungod kay gikatahong dunay valve nga gipalong sa Talisay sayo nianang buntaga ug maoy nakahatag og "gap" sa pagsirit sa tubig panganhi sa dakbayan.

Si Guanzon sa pakighinabi sa mga tigbalita kagahapon nagkanayon nga nakuntento siya sa gipakitang trabaho sa mga bombero apan mitug-an nga mopatawag siya og tigum sa BFP ug sa MCWD aron hisgutan ang problema sa tubig matag dunay mahitabong sunog.

Gawas sa tanang fire fighting units dinhi sa Sugbo, miresponde usab ang Filipino-Chinese Fire Brigade, Sto.Niño Fire Volunteers ug Lapulapu Fire Stations.

Migamit usab og Anuslite ug Fuel Buster nga kemikal ang mga bombero tungod sa mga mantikang nagdilaab nga lisod pagngon kung ordinaryong tubig ray gamiton.

Samtang gihimakak ni Codilla nga nahutdan dayon og tubig ang mga firetruck kay dili kini puno dihang miatraka sa sunog.

"Normal na gyud na (pagsaway) kay sa pagkatinuod ang mga bombero di gyud na sila mouli nga walay sulod nga tubig ang mga tangke," asoy pa sa opisyal sa Banat News.

Wala hinuoy nasakitan sa maong insidente ug padayon pang nanguykoy ang mga imbestigador sa fire scene aron pagkuhag dugang ebidensya nga magamit sa imbestigasyon.