Yo Latino pasirad-an na pud ni Tomas

Pormal nang gimanduan ni Mayor Tomas Osmeña ang City Attorney's Office nga moluwat na og closure order batuk sa establisamento nga gi-okopahan sa Yo Latino Restaurant sa may Lahug tungod sa pagmagahi sa tag-iya niini pag-comply sa tanang mga lagda sa siyudad.

Atol sa press conference kagahapon sa udto gitug-an sa mayor nga kaniadto ra unta sa wala pa ang Sinulog gitakda nilang pasirad-an ang maong establisamento gumikan sa daghang mga kalapasan niining nahimo sa Building Code.

Apan wala kini mahinayon gumikan kay na bisi sila sa Asean Summit og sa preparasyon sa Sinulog Mardi gras niadtong tungora.

Hinuon matud sa mayor nga dili ang tag-iya sa Yo Latino ang iyang gibasul sa maong mga kalapasan nga nahimo gumikan kay responsibilidad man kini sa nanag-iya sa gi-abangan niining establisamento.

Apan giklaro sa mayor nga mapugos siya sa pagpasira sa tanang mga patigayon nga nag-abang sa maong establisamento tungod kay padayong nagmagahi pag-comply sa Building Code ang nanag-iya niini.

Gitumbok sa mayor ang kapakyas pagbutang og parking space sa Yo Latino ngadto sa mga kustomer niini human dunay bag-ong edipisyo nga gitukod duol sa maong restaurant.

Gipasabot sa mayor nga susama kini sa nahitabo sa iyang planong pagpasira kaniadto sa Mango Square diin napagan ang tanang mga patigayon sama sa National Bookstore ug uban pang lihitimong mga negosyo tungod sa pagmagahi og sanong sa pamilyang Ludo nga maoy nanag-iya sa maong edipisyo pagkorihir sa mga kalapasan niini sa building code.