2 kritikal sa unom gipusil sa Mandaue

Duha ang kritikal sa unom ka batan-on nga gipamusil atubangan sa Mandue City Central School sa Centro, Mandaue kagahapon sa kaadlawon.

Sila si Arnold Yula, 31, ug Jeremy Granada, 32, pulos mga ulitawo mga lumad sa Alang-Alang, Mandaue anaa sa kritikal nga kahimtang human mangaigo sa ilang buko-buko ug bukton.

Silang Yula ug Granada anaa sa talandugon nga kahimtang sa Mandaue City Hospital.

Laing samaran sa maong insidente silang Jessica Remengtol 22, dalaga, lumad nga taga Danao, Tristan Miero, 21, ulitawo, lumad nga taga Lapulapu, Romeo Diaz Cabahug, 32, ulitawo ug Leffy Maringcuran, 24, ulitawo mga residente sa Alang-Alang, Mandaue diin nahiagum og mga samad pinusilan sa nagkadaiyang parte sa kalawasan.

Sa imbestigasyon ni PO2 Darios Conejos ug PO2 Rosendo Cabrera sa Station 1 sa Mandaue, nasayran nga naglakaw lamang atubangan sa Mandaue City Central School mga alas 12:45 kagahapon sa kaadlawon ang mga biktima.

Kalit lang miabot ang usa ka motorsiklo nga giluwanan sa duha ka mga tawo nga mideretso og pamusil ngadto kanila hinungdan sa ilang nahiaguman nga samad pinusilan agi sa kalibre .45 ug .9mm nga pistola.

Sa pagsubay sa kapolisan sa Station 1 usa sa anggulo nga ilang gilantaw mao ang kalambigitan sa kagubot sa fraternity sa Mandaue tungod kay base sa pamahayag sa mga residente sa maong dapit usa sa mga biktima ang namusil sa milabay'ng adlaw sa maong dapit ug posibleng igo lamang nga mibalos ang duha ka wala mailhing responsable sa pagpamusil sa mga biktima.

Matud pa sa mga biktima nga human sa maong insidente dali nga misibat ang duha ka suspetsado luwan sa usa ka pula nga motorsiklo.

Hangtod ning pagsuwat sa balita pabilin pa gihapong anaa sa kritikal nga kondisyon si Yula ug Granada samtang padayon usab ang pag-imbestigar sa kapolisan sa Station 1 sa maong insidente.