Human sa maong eleksiyon, milahutay ang panag-alalay nilang Mondigo ug Martinez hangtud nga nasiak pagbalik sa miaging tuig human mipahibawo si Mondigo nga modagan pagbalik sa pagka-mayor atbang sa kandidato ni Martinez.
Gikataho nga si Bise-Mayor Ricky Ramirez mao ang kandidato ni Martinez sa pagka-mayor sa umaabot eleksiyon kauban ni Konsehal Michael Miranda, ang kanhi pangulo sa Philippine Councilors League sa lalawigan sa Sugbo.
Samtang si Mayor Manreza Lim maoy modagan sa pagka bise mayor kauban ni Mondigo.
Si Mondigo nahimong mayor samtang si Lim ang bise mayor sa lungsod sa Medellin sukad sa tuig 1980 ubos sa Kilusang Bagong Lipunan ni kanhi diktador Ferdinand Marcos.
Gipalagpot sila sa katungdanan human sa Edsa Revolution sa tuig 1986 sanglit gipang-ilisan man ang tanang piniling opisyal ubos sa bag-ong administrasyon ni kanhi Presidenti Corazon Aquino.
Sa eleksiyon sa tuig 1988, nibalik pagpapili sila si Mondigo ug Lim isip mga independenti ug nakuha nila ang kinabag-ang suporta sa katawhan hangtud na sa eleksiyon sa tuig 1992.
Sa eleksiyon sa tuig 1995, wala na'y niatbang nilang Mondigo ug Lim.
Si Mondigo nipapili sa pagka-sakop sa hunta probinsiyal sa Sugbo sa tuig 1998 samtang si Lim na usab ang nahimong mayor hangtud karon gumikan sa maayong agi sa iyang pamunoan.
Si Mondigo nahimong presiding officer pro-tempore sa hunta probinsiyal isip dunay labing taas nga porsyento sa mga botos nga nakuha sa tanang nidaug sa eleksiyon.
Matud pa ni Mondigo nga napugos siya nga modagan sa pagka-mayor gumikan sa hangyo sa grupo ni Lim apan ubos sa kampo ni Gob. Gwen Garcia nga maoy kaatbang sa kampo ni Martinez.