Polis-polis pangdakpon na

Pang dakpon na ang mga tawo nga magpa polis-polis kung makit-an sa kadalanan magsul-ob ug uniporme sa polis bisan sila dili sakop sa PNP.

Si Acting Director sa Cebu City Police Office Sr Supt. Patrocenio Comendador sa pakighinabi sa mga tigbalita kagahapon niingon kadtong mga asset sa polis, tanod ug ordinaryong sibilyan ang panakpon kung magsul-ob ug mga t-shirt , jacket, ug uban pang may markang "PNP" o kaha "Police".

Matud ni Comendador warningan lang una ang makit-ang magsul-ob niini sa polis apan sa sunod nga higayon ila na gyud kining dakpon.

Gipahibalo ni Comendador nga nakadawat na siyag direktiba gikan sa Comelec ug kinahanglang iya kining ipatuman gawas pa niini gidili gyud kini sa balaod.

Ang mga sakop sa Mobile Patrol Group maoy gitahasan ni Comendador nga usa ka monitoring team ug kinahanglan tumanon ang deriktiba sa Comelec

Apan matud niya iya pa kining ikonsulta sa Local Government Unit (LGU) sanglit sagad sa manul-ob niini mga tanod.

Nunot kini sa nahitabong tulis sa Dranix Incorporated niadtong Lunes sa kaadlawon diin mikalas ug usa ka kinabuhi sa guwardya human gipusil sa mga tulisan nga nagsul-ob ug uniporme sa polis.