Rebelde gihataga'g tag P30 mil

Nadawat na sa pamilyang rebel returnees ang P30,000 nga hinabang gikan sa Kapitolyo kagahapon aron idugang sa pagsugod sa iyang panginabuhi.

Si Luciano Poro gikuyugan sa mga sakop sa 78th Infantry Battalion ug kapolisan sa lungsod sa Catmon ug ni Mayor Estrella Aribal sa pagkuha sa tseke gikan kang Gob. Gwen Garcia kagahapon sa Kapitolyo.

Si Poro kauban sa iyang asawa ug anak ang nitahan sa mga lokal nga opisyal sa lungsod sa Catmon sa niaging tuig human wala na kaagwanta sa ilang kahimtang sa kabukiran isip sakop sa rebeldeng New People's Army.

Matud pa ni Aribal nga ila na nga gipatukuran og tindahan ang magtiayung Poro duol sa Catmon Police Station aron makapanginabuhi na nga malinawon.

Ang P30,000 nga nadawat ni Poro sa Kapitolyo kagahapon idugang kini sa puhunan sa tindahan sumala pa ni Marivic Garces, ang provincial social welfare officer sa Sugbo.

Samtang gipasalamatan ni Poro si Garcia ug Aribal sa hinabang nga iyang naangkon ug nipasalig nga dili na mobalik sa kalihukan sa mga walhon.

Si Garcia nipadayag nga bisan gikasuko sa mga walhon ang iyang pagdeklarar og all-out-war batok sa mga teroristang komunista, kaayuhan gihapon ang iyang gitan-aw sa mga sakop niini nga mobiya sa ilang kawsa.

Nanghinaut si Garcia nga duna pay sama kang Poro nga makaamgo nga sayop ang ilang idolohiya nga ilang gisudlan diin ang tanang gisaad walay katumanan.

Samtang matud pa ni Poro nga wala siya gibati og kahadlok sa iyang kahimtang sa pagkakaron sanglit gibantayan siya sa kapolisan.

Nanawagan usab si Poro sa mga rebeldeng NPA nga anaa pa sa kabukiran nga mobalik na sa sabakan sa gobyerno aron makapuyo nga malinawon kauban sa tagsatagsa nila ka pamilya sama sa nahitabo kaniya sa pagkakaron.