Kintanar miduso'g kandidatora

Si Atty. Oliveros Kintanar mao karon ang pinakaunang miduso sa iyang sertipiko de kandidatura sa pagka bokal sa probinsiya sa Sugbo isip usa ka independente.

Kini maoy gitug-an ni Provincial Comelec Officer Atty Edwin Cadungog sa dihang nahinabi sa mga tigbalita kagahapon sa iyang buhatan.

Matud pa ni Cadungog sukad sa pagsugod sa pag-abli sa filing of certificate of candidacy sa mga buot magpapili bugtong si Kintanar pa lamang ang nahiuna sa iyang listahan nga misumitir sa iyang kandidatora.

Si Kintanar miduso sa iyang sertipiko de kandidatura mga alas noybe kuarintay singko kagahapon sa buntag ug sinaksihan sa iyang kaubang abogado ug sa mga sakop sa media.

Sa dihang nahinabi sa mga tigbalita si Kintanar, siya mitug-an nga ang iyang pagkandidato sa pagka bokal sa ikaduhang distrito nahimo kini pinaagi sa motibisyon ni kanhi gobernador Pablo Garcia nga giisip niyang tinuod nga amahan sa probinsiya.

Gidugang pa ni Kintanar bisan kon siya magpapili isip independente kusganon gihapon siya nga mosuporta sa kandidatora sa mga Garcia kay iyang nakita ang ilang pagka sinsero sa panerbisyo sukad pa kaniadto ug hangtod karon.

I opted to run as independent because I was uncertain if I will be welcome if I ask to be in his line-up and besides some commitments might have already been finalized and my entry might only be an obstacle to that commitment which is unfair to those concerned" matud pa ni Kintanar.

Tungod niining kalambuan sa pagdagan ni Kintanar hayan nga mas mapalig-on pa gayod ang kandidatora ni kanhi gobernador Pablo Garcia pagka kongresista sa ikaduhang distrito ug nga posibleng makuha ang suporta sa ubang kaalyado ni Kintanar.