Ang biktima nga si Michael Regidor Duaban, 25, residente sa Univille, Banilad kinsa ulahing nakit-ang gigukod sa grupo sa mga lalaki nga gituuhang miyembro sa fraternity gikan sa usa ka diskohan sa dili layo sa Univille.
Ang mirespondeng mga sakop sa Special Weapons and Tactics pinanguluhan ni SPO1 Jose Ragel, duha ka sakop sa Mabolo police station nga sila SPO1 Ricardo Escobido ug PO1 Mario Agda ug upat ka sakop sa Mobile Patrol Group maoy nakadakop sa upat sa mga suspek.
Ang nangadakpan giilang sila si Benjie Pardillo, 19, taga Kasambagan, Aldrin Sanchez, 25, taga Kasambagan, Dinobreck Soquiño, 20 ug manghod niining si Brian Soquiño pulos usab taga Kasambagan, samtang gituuhan sa kapolisan nga duna pa silay mga kaubang daling nakaikyas atol na sa ginukdanay.
Ang mga suspek gikatahong maoy nakit-ang migukod sa biktimang si Duaban hangtud diha sa gamayng agianan sa sitio Baka diin usab makit-ing nalup-og ang biktima nga wala nay kinabuhi ug daghan na og samad dinunggaban sa kalawasan ug ulo.
Ang mga nadakpang suspek nga gidudahang miyembro sa usa ka fraternity giingong nasigpatan sa mga residente nga nagkadugo pa ug nanago sa panimalay ni Terencio Lacañas.
Ang mga sakop sa SWAT ug ubang mirespondeng mga polis mao nay mialirong sa maong balay hinungdan sa pagkadakop kanila.
Sa imbestigasyon sa kapolisan nasuta nga sayo pa niana, ang igsuon sa biktima nga si Gabriel maoy unang gikasangka sa pundok sa mga suspek diin siya gitabangan usab og bukbok sa grupo.
Wala pa matino sa kapolisan kung unsa gyuy motibo ug gitabangan ang biktima apan si Inspector Mario Monilar, hepe sa Homicide Section nagkanayon nga base sa kadaut nga nahiaguman sa biktima gitabangan kini ug dunggab ingon man og puspos.
Matud pang Monilar walay miangkon sa grupo kung sila mga miyembro sa fraternity.