Iskolar sa Pardo Parish andam sa imbestigasyon

Andam moatubang sa usa ka imbestigasyon nga himuon sa Simbahang Katoliko ang kanhi scholar ug kawani sa Parokya ni Sto. Tomas de Villanueva sa Poblacion - Pardo batok sa duha ka pari sa maong parokya.

Si Pol Navarro Padasas nagkanayon sa sulat nga gipadala niini ngadto ni Arsobispo Ricardo Cardinal Vidal nga andam niyang barugan ang nahauna niyang alegasyon sa unang affidavit.

"I will tell you what I know without fear or favor. I am doing this not to destroy our Church but to help purify it from bad shepherds," sumala pa ni Padasas sa iyang sulat.

Gitataw ni Padasas nga wala niya pangayoa nga tuohan siya sa iyang ipanulti unya sa imbestigasyon.

Sumala pa niya nga matagbaw lamang siya kun mahatagan siya og higayon nga maasoy sa kadagkuan sa Simbahan unsay iyang nasayran batok ni Padre Domingo Tapic ug Msgr. Constantino Diotay.

Si Padasas, kahinumduman, kauban ang usa ka John Soronio, miluwat og affidavit nga nag-akusar ni Msgr. Diotay og lainlaing imoralidad ug pagpanag-iya og mga kabtangan nila ni Padre Tapic.

Si Padasas mibakwi sa nahauna niyang mga pamahayag sa iyang affidavit pinaagi sa pagluwat og ikaduhang affidavit. Apan, wala magdugay, gibakwi ni Padasas ang iyang ikaduhang affidavit ug gi-reaffirm ang nahauna niyang mga pamahayag nga nag-akusar sa duha ka pari sa lainlaing mga kahiwian sa parokya sa Pardo.

Sa iyang sulat ngadto ni Cardinal Vidal, si Padasas nagkanayon nga ang ikaduhang affidavit nga nagsuporta ni Padre Tapic walay kamatuoran tungod kay gipugos siya sa pagpamakak, ilabi na sa mga supporters sa pari.

Giasoy niya nga sa sulat nga nawad-an siya og mga higala ug gikuwestiyon ang iyang motibo sa dihang iyang gibalik ang iyang nahaunang akusasyon. Sumala pa niya nga nawad-an siya og trabaho tungod sa iyang paghunong og drive sa iyang amo nga supporter ni Padre Tapic.

Ang kagubot tali sa mga parokyano sa Pardo ug sa duha ka pari midako pag-ayo. Gani, miresulta kini sa kinihaay tali sa mga pari ug sa mga opisyal sa Parish Pastoral Council nga maoy gipasanginlan sa duha ka pari nga maoy nagmaniobra nga gub-on ang ilang pagkatawo.

Ang mga parokyano giakusahan nilang Msgr. Diotay ug Padre Tapic nga maoy adunay dautang motibo pagguba sa ilang pagkatawo pinaagi sa pag-akusar kanila sa mga walay basehan nga mga butang.

Ang mga akusasyon nga daling gihimakak tungod kay sumala pa nagpakaulaw lamang sa monsenyor naglangkob sa mga pasangil nga aduna siyay napamabdosan nga pag-umangkon nga gipasakal sa usa ka lay minister didto sa Consolacion ug may anak nga kaluha sa laing babaye. Gawas niini, giakusahan usab siya nga may tulo ka apartments sa Pulpugan, Consolacion ug usa sa Bogo.

Samtang si Padre Tapic gipasanginlan usab nga may beach resort, apartment sa Inayagan, Minglanilla, nga yuta sa Sinsin ning dakbayan, Inayagan sa Minglanilla, Camborong sa Oslob, Caseres sa Oslob, Tugas sa Pardo, ug usa ka kan-anan. Apan si Padre Tapic, sa iyang affidavit niadtong Nobiyembre 10, 2006, miasoy nga dili tinuod nga nanag-iya siya og yuta sa Camborong, Oslob nga 40 hektaryas, tungod kay 1,000 metro kuwadrado lamang kini og dili P3 milyones ang kantidad kun dili P25 mil lamang. Mihimakak usab siya nga nanag-iya og luna sa Tan-awan, Oslob.

Ang Banat News misulay og tawag sa parokya sa Pardo apan napakyas pagkuha sa habig sa duha ka pari.