Suroy-suroy sa Sugbu walay politika

Suroy-suroy sa habagatan nga kalungsuran sa probinsiya sa Sugbu nga bag-ohay pa lamang natapos sa gobernador niadtong Biyernes dili kini pamolitika, sumala pa ni Gobernador Gwendolyn Garcia.

Matud pa sa gobernador nga ang suroy-suroy usa na sa iyang mga programa kaniadto pa sa dihang pagsugod niya sa iyang termino, gani kini ikatulo naman ka higayon nga nahimo.

Gitug-an sa gobernador nga tungod niining programaha, ang turismo sa probinsiya milambo ug nailhan kini tungod kay nidaghan ang mga turista nga midayeg sa mga lugar sa kalungsuran ug usab sa pag-abi abi kanila sa mga katawhan ug pagpakita sa mga kaugalingong produkto.

"Sayop ang ilang giingon nga ako namolitika, unsaon man nako pagpamolitika nga kining mga balikbayan ug mga turista di man makabotar dinhi sa Sugbu," matud pa sa gobernador.

Alang sa gobernador bisan pa man sa mga pagsaway kaniya sa mga kaatbang sa politika, ang iyang konsensya limpyo ug kini alang gayod sa kaayohan sa pagpalambo sa turismo sa Sugbu kay bisan gani hangtod karong panahona wa pa siya maghunahuna ug pamolitika.

Sa nasayran na nga niadtong petsa 24-26 niining bulana, ang gobernador maoy mismo nangunay sa pagdala sa mga turista ug mga balikbayan sa suroy-suroy sa habagatang Sugbu ug tanan nga mikuyog niini natagbaw gayod ug gusto nga moapil pa sa sunod pa nga katuigan.

Tungod niining kalambuan ang gobernador mapasalamaton sa mga niapil niining programa ug usab sa mga kalungsuran nga ilang nabisitahan ug nidawat kanila ug siya naglaum nga mas mailhan pa gayod ang Sugbu.