Bullecer buot nga pahulipan ni Tomas

Namiligrong mahulipan sa katungdanan ang tsirman sa Cebu City Anti Indecency Board (CAIB) karong tuiga human wala matagbaw si mayor Tomas Osmeña sa gipakitang labok niini pagsumpo sa tanang mga law-ay'ng talan-awon ug basahon dinhi sa dakbayan.

Nasayran nga hangtud karon wala pa ma-renew sa ilang mga katungdanan ang tanang mga gitudlong sakop sa CAIB nga gipangulohan ni Dr. Rene Josef Bullecer.

Apan gipadayag sa mayor nga bukas siya niadtong si bisan kinsa nga irekomendar nga itudlong hulip ni Bullecer pagka chairman sa CAIB karong tuiga.

Wala matagbaw ang mayor sa performance ni Bullecer pagdumala sa CAIB sa nilabay'ng tuig nga operasyon.

Gitumbok ni Osmeña ang kapakyas ni Bullecer ug sa CAIB paghingusog sa pagpatuman alang sa pagpanalipod sa katungod sa mga minor de edad aron malikay kini sa piligro.

Giklaro sab ni Osmeña nga wala usab siya maglaom nga makahimo og mga maayong buhat kabahin sa kampanya sa anti indecency si Bullecer hinungdan nga wala na siya masurpresa kun nganong dili epektibo ang maong grupo.

Gisaway sa mayor ang pagtutok sa CAIB sa kampanya batok sa nagpadayong sirkulasyon sa mga law-ay'ng basahon gikan sa Manila nga miabot dinhi ingon man sa mga law-ay'ng pelikula nga alang sa mayor imposible ug lisud kaayong masumpo.

Sa pagkakaron, hugot gihapon ang kampanya sa mga sakop sa Cebu Anti-Indecency Board (CAIB) pagbantay sa mga massage parlor dinhi sa dakbayan sa Sugbu.

Matud pa ni Bullecer nga gibantayan ang massage parlor ilabi na gyud ang natala sa mantalaan diin nagka-anam og kadaghan ang nagpa-advertise niini bisan pa man ang uban walay klarong address.

Gani pinaagi niini posibling maghitak ang mga prostitutes dinhi sa dakbayan sa Sugbu ug ila na kini karon gipangitaan og paagi aron masugpo ang maong matang nga negosyo.

Midugang si Bullecer nga kinahanglan nga ang tanang massage parlor dinhi sa dakbayan sa Sugbu mokompleto gyud sa rekisitos sama sa business permit nga pagakuhaon gyud sa tanang negosyante nga nagtukod og negosyo dinhi sa dakbayan sa Sugbu.