Kabalayan sa Dumlog daplin sa kasapaan ipalarot kay peligro

Mga residente nga nagpuyo diha daplin sa sapa sa Dumlog ipalarot sa kagamhanan sa siyudad para paglikay sa posibleng aksidente kung motubo ang tubig sa sapa.

Ang konseho sa siyudad miaproba sa resolusyon numero 2007-20 nga nag-awhag ni Mayor Socrates Fernandez ug sa engineering office nga mopahigayon og mga malinawong lakang para sa paglarot sa mga namuyo diha sa nahisgutang lugar.

Ang nahisgutang resolusyon nga gipaluyohan ni Konsehal Rodolfo "Rodi" Cabigas tsirman sa komitiba sa Public Works and Infrastructure nagkanayon nga tumong sa kagamhanan sa Talisay ang pagprotekta sa mga lumulupyo sa siyudad.

Sa gipahigayong occular site inspection sa kagamhanan nasuta nga adunay 21 ka balay ang gitukod diha ilawom sa tulay sa Barangay Dumlog ug Biasong diin duol kaayo kini sa sapa.

Ang maong mga balay posibleng maanod sa baha kung motubo ang tubig sa sapa og nakahatag kini og peligro sa mga kinabuhi sa mga namuyo diha sa lugar.