Cuenco ipa-ombuds ni Guardo

Mopasaka og kasong kurapsiyon sa Ombudsman Visayas si kanhi Cebu City Sports Commissioner Jonathan "Atan" Guardo batuk kang kongresista Antonio "Tony" Cuenco karong sunod semana.

Gibutyag ni Guardo dihang nahinabi sa Banat News nga mosang-at siya og pormal nga reklamo batok kang kongresista Cuenco sa Ombudsman tungod sa kwestyonable nga pagpamalit niini sa 20 ka mga multicab nga gipanghatag sa kabarangayan sa South District.

Matod ni Guardo nga base sa mga ebedensiya nga iyang nahipos walay klarong bidding nga dihang gipalit sa kongresista ang maong 20 ka mga multicab gamit ang Countrywide Development Fund (CDF) sa kongresista ug gawas pa mahal ra kaayo ang presyo niini nga tag P300 mil pesos ang matag usa.

Gipasabot ni Guardo nga klaro kaayong dunay over price nga nahitabo niining maong transaksiyon gumikan kay ang presyo sa multi cab mapalit ra man unta kini sa tag 60 ngadto sa 70 mil pesos nga dako kaayo og deperensiya sa P300 mil pesos nga pagpamalit ni Cuenco.

Sayo niini si Cuenco ni-kwestyon sa Comelec kabahin sa mga paid advertisement ni Guardo sa telebisyon nga nagpasundayag sa iyang kandidatura sa umaabot nga eleksyon nga gipaagi lang og endosar sa iyang mga produkto.

Apan alang kang Guardo wala siyay nalapas nga balaod ning iyang gihimo gumikan kay gawas nga wala pa siya maka-file sa iyang kandidatura igo lang usab siyang nag-endosar sa iyang mga produkto.

Gani gisumbalik ni Guardo si Cuenco nga sama kaniya nisagop usab og mga advertisement og gigamit niining hinagiban ang kampanya niini batok sa drugas.

Ang duha maoy dayag na kaayong posibleng magsangka unya sa South District karong umaabot nga piniliay.

Kagahapon, gisuwayan og tawag sa Banat News ang telepono ni Cuenco aron kakuhaan og reaksiyon sa iyang habig apan dili makontak ang telepono niini.