Di tinuod nga P95 mil ang matag lamp post sa DPWH

Usa ka kawani sa DPWH nga nadestino sa accounting section mitataw nga dili tinuod ang report nga nagkantidad og tag P95,000 ang matag usa sa mga decorative lamp post nga gigamit pagpaanindot sa mga karsada nga giagian sa mga delegado sa milabay'ng Asean summit dinhi sa Sugbo.

Ang maong opisyal nga nihangyo nga dili lang magpaila sa iyang kaugalingon dihang nahinabi sa usa ka lokal nga sibyaanan mitataw nga ang matag usa sa mga decorative lamp post wala gani makaabot og P50,000 ang kantidad.

Apan gitataw sa maong opisyal nga ang maong kantidad dala na ang pagpatindog sa mga decorative lamp post ingon man ang pag-instalar sa maong mga suga.

Gibutyag sa maong kawani nga wala lang makasabot ang kadaghanan sa mga sakop sa media nga mituki sa maong isyu tungod kay lahi kadtong mga decorative lamp post nga nagkantidad og P95,000.

Ang decorative lamp post nga nagkantidad og P95,000 mao ang susama nianang gibutang diha atubangan sa Kapitolyo, diin mas daku ug mas hayag kon itandi sa mga gagmay'ng decorative post.

Ang kadagkoan sa DPWH pinangulohan ni director Robert Lala gipasakaan og kaso diha sa Visayas Ombudsman tungod kay ang complainant nga si Cris Saavedra mikwestyon sa presyo sa maong transaksiyon.

Ang Ombudsman hinoon miawhag na sa mga opisyal sa DPWH nga tubagon ang reklamo nga gipasaka batok kanila.