9 ka babaye mireklamong nailad sa illegal recruiter sa Bulacao

Usa ka talents promotions ang gireklamo sa siyam ka mga babayeng mipasangil nga sila nabiktima sa illegal recruitment diin sila gipasaligang patrabahuon sa Uropa ug sa nasud sa Korea sukad pa niadtong milabay'ng tuig apan hangtud karon wala kini mahitabo.

Ang gireklamong kumpanya mao ang Ichiban Promotions nga gipanag-iya ni Jovelyn Sotto, 23, residente sa Mansuete Village sa Bulacao sa dakbayan sa Talisay kinsa gidakop sa grupo ni Chief Inspector Fermin Armendares ang pangulo sa Criminal Investigation and Detection Team sa CIDG7.

Ang operasyon gihimo pinaagi sa entrapment operation niadtong milabay'ng Miyerkules sa hapon diha sa buhatan ni Sotto diin migamit ang grupo og P2,500 nga marked money nga may ultra-violet powder. Ang maong bayad giingong maoy gipangayong bayad ni Sotto para sa medical examination sa usa sa mga aplikanteng si Daphne Menguito.

Usa ka Jovelyn Gemenez,26, ug Amalia Roma maoy unang misumbong ngadto sa buhatan sa CIDG7 kinsa pareho usab nga gipasaligang patrabahuon sa Uropa isip mga entertainer sukad pa sa miaging tuig apan hangtud karon wala gihapon sila makalarga.

Gawas kanilang tulo nangabot usab ang laing unom ka mga giingong gi-rekrut ni Sotto ug pareho usab nga namahayag nga sila nakabayad na og susamang kantidad.

Gikatahong ang duha nakakuha og sertipikasyon sa Philippine Overseas Employment Administration nga dili rehistradong recruitment agency para trabaho sa laing nasud ang kumpanya ni Sotto.

Apan si Sotto dihang gihinabi sa mga tigbalita kagahapon mihimakak nga recruitment agency ang iyang kumpanya sanglit usa lang kini ka promotions ug talents center, diin ang mga aplikante ipailawom sa pagbansay-bansay sa pagkanta ug sayaw.

Miangkon si Sotto nga duna siya'y kontak nga recruitment agency sa Pasay City nga World View Agency nga gidumala sa usa ka Imelda Lagbo alyas Kathy, si Sotto usab ang midawat og bayad nga P2,500 gikan sa mga aplikante isip bayad sa ilang medical examination apan iya kining gipadala ngadto sa Pasay.

Matud pang Sotto si Lagbo maoy nangita og mga aplikante aron patrabahuon sa Uropa isip entertainer apan dihang gipahibalo siya niini nga ang gipangayong mga talents pasayawon og hubo wala na kini ipadayon ni Sotto ug giingnan ang mga reklamante nga dili na sila mahinayon.

Dunay mga aplikanteng reklamante ang nakatrabaho na sa Japan isip entertainer apan gumikan kay gihugtan na ang pagpatrabaho sa maong nasud adto nalang sila sa nasud sa Korea nagplanong manrabaho pag-usab apan giingong nailad sila ni Sotto.

Si Sotto gikatakda pang mopresentar og lisensya gikan sa Department of Trade and Industry ug ubang papeles sa iyang kompanya aron pagmatuod nga di sila recruitment agency.

Apan si Chief Inspector Rex Derilo nagkanayon nga pasakaan gihapon nila og kasong illegal recruitment si Sotto base usab sa pamahayag sa mga reklamante.