Gipalusot nga tambal

Duha ka karton nga gidudahang peke nga mga tambal ug bitamina nga nagkantidad og P300 mil ang gisakmit sa mga sakop sa Criminal Investigation and Detection Group 7 diha sa bodega sa usa ka cargo freight sa North Reclamation Area sa dakbayan sa Mandaue niadtong milabay'ng gabii.

Ang maong mga kahon gidudahang gikan sa Manila ug gikatakdang ipadala ngadto sa Mindanao ug dinhi sa Kabisay-an apan natino gikan sa Bureau of Food and Drugs nga wala kini mga dokumentos.

Ang CIDG7 nga misakmit sa maong mga kargamento gipanguluhan ni Chief Inspector Jacob Macabali human sila makadawat og impormasyong dunay moabot nga mga pekeng tambal diha sa maong bodega nga dad-unon sa Mindanao.

Matud pang Macabali nga ang x-ray operator nga maoy misusi sa mga kargamento maoy nakamatikod nga wala magtukma ang deklarasyon sa dokumentong gibutang sa nagpadala nga medical supplies , sapatos ug mga sinina hinungdan nga ila kining gi-hold.

Dihang gisusi na sa CIDG7 ug duha ka Food and Drugs Regulation Officers sa BFAD nga sila si Salome Largo ug Terry Ann Cuyos dili medical supplies , sinina ug sapatos ang sulod niini kundili mga nagkalain-laing mga bitamina ug antibiotics.

Ang maong kargamento naa sa pangalan sa usa ka Joey Fernandez nga taga Aragon St. Sta.Cruz sa Manila ug ang mga consignees niini mao sila si Nelisa Magdasal ug Joseph Maribao nga parehong dunay address dinhi sa Sugbu.

Apan usa sa namatikdan sa CIDG nga pareho ra og contact numbers sila si Maribao ug Magdasal sa matag karton hinungdan nga nagduda silang "fictitious" ang maong mga pangalan.

Gikatahong dunay mga representante ang maong mga consignees nga giilang sila si Margarrete Fua nga taga Dumaguete City ug Edsil Cortez nga taga A.Cortez sa dalan A.Morales ning dakbayan nga misuway og kuha sa maong mga kargamento diha sa bodega apan wala sila tuguti tungod kay wala sila makapakita og ligal nga dokumento sa pagbaton og susama kadaghang mga medisina.

Matud pang Cuyos sa mga tigbalita nga ila ng gisusi ang gipangangkon sa mga representante sa mga consignees nga Farmacia Magdasal ug Farmacia Maribao dinhi sa dakbayan sa Sugbu apan wala kini sa mga lisensyadong listahan sa mga pharmacy.

Nasuta usab nga wala makapakita ang mga representante og certificate of product registration ug license to operate and distribute nga gikan sa BFAD.

Matud pang Macabali ila pang huwaton ang eksaminasyon sa BFAD sa maong mga tambal aron tinuon kung di ba kini mga peke.

Samtang gawas sa maong duha ka karton, duna pay laing tulo ka karton nga susama gihapon niini ang gikatakdang buksan tungod kay makaduda ang sulod niini.