Kini human napupos na kagahapong adlawa ang deadline sa renewal aplikasyon para for business permit sa City Hall nga gipahigayon diha sa ground floor sa SM City sa may North Reclamation Area.
Gibutyag ni Liezel Gonzaga sa Customer Service makabayad na og dos porsyento nga multa matag bulan ug wala pay labot sa 25 porsyento nga surcharge kadtong mga negosyante nga mo-renew sa ilang business permit sugod karong adlawa.
Gikan niadtong Enero 2 niining bulana hangtod kagahapon lang ang tagal nga gihatag sa City Hall alang sa renewal sa business permit karong tuiga aron makapadayon sa pag-operate sa ilang pamatigayon sa legal nga paagi.
Ang Mayor's Management Team (MMT) ug ang Management Information Computer System maoy gitahasan pag-asikaso sa nagpadayong renewal.
Gikan sa alas 10 sa buntag hangtod sa alas 6:30 sa hapon ug walay non break ang gipahigayon nga pagpanawat sa tanang aplikasyon sa business permit.
Nasayran gikan kang City Treasurer Tessie Camarillo sa dihang nahinabi sa Banat News nga gikan niadtong Enero 2 hangtod sa deadline kagahapon miabot na og 18,964 ang tanang mga gagmay og dagko nga negosyante dinhi sa dakbayan ang naka-renew na sa ilang business permit.
Matud ni Camarillo nga magpadayon gihapon karong adlawa ang renewal ug hangtod na nga mahurot og atiman ang tanang mopa-renew sa business permit apan duna lay multa og surcharge nga ipahamtang.
Padayong misaka ang gidaghanon sa mga ni-aplay og business permit tungod sa paghingisog sa Revenue Monitoring Task Force pagmonitor niadtong mga establisemento,sari sari store og uban pang gagmay'ng pamatigayon dinhi sa dakbayan nga walay bayad bayad og buhis sa siyudad.