Balay ni Goliat naugdaw

Naugdaw ang panimalay sa usa ka inilang komedyante sa radyo ug telebesyon human miulbo ang sunog kagahapon sa hapon sa may Abellana Street, Quiot ning dakbayan sa Sugbo.

Ang alarma sa sunog nadawat sa kabomberohan 1:25 sa hapon nga gipaubos sa second alarm ug napawong ang kalayo paglabay sa singko minutos.

Ang naugdaw nga panimalay gipanag-iya ni Allan "Goliat" Nacorda 40 minyo ug nagpuyo sa maong dapit. Si Goliat magsusulat niining Banat uban ni Julian "Teban" Daan.

Si Goliat nga naila dinhi sa Sugbo sa iyang pagka komedyante nga gikahinabi sa Banat News kagahapon miingon nga naatol nga diha ibabaw sa kapilya dili halayo sa ilang panimalay nag shooting "Kung Tigas Mo, Tigas sad Ko "sa mga kauban nga cast sa CCTN.

Matud niya nga kalit kaayo ang pag-ulbo sa kalayo nga nagsugod sa diha sa kuwarto sa iyang balay.

Ang iyang asawa nga si Lisa, 39, ug ang katabang nga si Teofilo Jason nga usa ka mahuyang maoy nahabilin sa balay.

Matud niya nga naligo ang iyang asawa sa banyo ug gisinggitan kini sa iyang katabang nga milayat na sa hagdan gikan sa ikaduhang andana sa ilang balay.

Dugang pa'ng Goliat iyang gipangutana ang iyang katabang nga mahuyang sa hinungdan ug miingon nga cellphone ang sinugdanan sa kalayo human mibuto.

Apan nagtuo si Goliat nga nangutaw ang iyang katabang sa kuwarto sa ikaduhang andana gamit ang plantsa ug gibiyaan.

"Nag-on siguro ang plantsa basin nga nangutaw akong katabang nya gibiyaan kay nangutana ko sa bombero kun mobuto ba ang cellphone ingon man nga dili" matud ni Goliat.

Si Lisa nga nahinabi usab sa Banat News mitug-an nga human na siya og kaligo misulod siya sa kuwarto aron mag-ilis apan nakadungog siyag usa ka buto ug misunod dayon ang piti nga naggikan sa kuwarto sa iyang anak.

Matud ni Lisa nga nangutana pa siya sa iyang katabang unsay mibuto ug dali niyang gimanduan nga susihon apan giingon na siya nga dako ang kalayo sa kuwarto ug dali kini mikatap sa kisame hangtod nga milamoy sa balay sa iyang mga silingan.

Nagtuo si Lisa nga gikan natulog ang iyang katabang ug bag-ong nagmata gani nagpula pa ang duha ka mata nga nagpahibalo kaniya.

Dako usab ang pagtuo ni Lisa nga naggamit og plantsa ug nakalimtan kini og pawong.

Sa pasiunang imbestigasyon ni SFO1 Frank Donozo nasayran pito ka panimalay ang hingpit nga naugdaw ug laing duha ang nakan-an sa kalayo.

Laing balay nga nasunog gipanag-iya sa kawani sa The FREEMAN nga si Ruth Tabas sa Circulation Department.

Gibanabanang P120,000 ang kinatibuk-an nga danyos sa sunog ug gikatahong walay naangol nga mga sibilyan ug bombero.