Katungod sa publiko ipatigbabaw

Ang Commission on Election (COMELEC) nipahinumdum sa kapulisan ug militar nga ipatigbabaw ang "Constitutional Rights" sa publiko atol sa ilang mga checkpoint nunot sa pagpatuman sa gunban.

Matod ni Atty. Lionel Castilliano, acting regional legal officer sa Comelec-7, nga wa pa gyud sila magkatigom kang CCPO director Patrociño Comendador nunot sa nagsingabot nga eleksyon tungod sa padayon nilang paglimpyo sa records sa listahan sa mga botante.

Matod ni Castilliano nga sulod sa 24 ka oras ang cleansing sa voter's lists tungod sa pag-apas sa deadline karong Enero 31.

"Ang among priority ron mao ang pag limpyo una sa mga voters lists kay importante ni para hapsay unya ang eleksyon karong May 14," si Castilliano nagkanayon.

Matod niya nga lakip sa ilang gilimpyohan ang mga multiple entry sa nagpa rehistro, listahan sa mga patay ug kadtong wa makabotar sulod sa duha ka sunod sunod nga eleksyon.

Nagkanayon si Castilliano nga human unya sa paglimpyo sa voter's lists diha na sila makigtigom uban sa kapulisan aron mapadangat ang mga lagda sa gunban apil sa mga areas of concern atol unya sa eleksyon.

Sa iyang bahin, si COMELEC provincial election officer Edwin Cadungog nitataw nga unya na sab sa buwan sa Pebrero ang gitakda niya nga command conference uban sa taga Cebu Provincial Police Office.

Matod ni Cadungog nga ilang i-asset ang mga lungsod nga gideklarar sa niaging 2004 election nga hotspots.

Lakip sa gilista sa areas of concern niadtong 2004 election mao ang lungsod sa Madridejos, Santander, Naga, Danao city, Lapulapu city, Daanbantayan ug Toledo city.

Ang gideklarar nila nga Comelec control mao ang lungsod sa Madridejos, Santander, Danao city. .