Uyoan ug pag-umangkon ang nabalintong sa motor, 1 patay

Namatay ang usa ka tawo ug kritikal usab ang pag-umangkon nga angkas niini dihang ang motorsiklo nga ilang giluwanan ang kalit lang nabangga sa gutter sa Marcelo Fernan Bridge sa dakbayan sa Mandaue alas 6 pasado sa miaging gabii.

Si PO3 Jose Ruel Trinidad sa traffic section sa kapolisan sa maong dakbayan miila sa namatay mao si Vicente Pilapil, 47 anyos, minyo nga lumad nga taga Liloan ug kasamtangan nagpuyo sa Abuno, Pajac, dakbayan sa Lapulapu.

Giila usab ni PO3 Trinidad ang giangkas niining pag-umangkon nga mao si Manlee Pequerro, 14 anyos ug nagpuyo usab sa nahisgotang dapit.

Si PO3 Trinidad nga gikahinabi sa Banat News miingon nga gikan sa habig sa dakbayan sa Mandaue ug kusog nga nagdagan paingon sa dakbayan sa Lapulapu.

Sa paghidangat sa maong dapit daw nawad-an kontrol sa pagpadagan sa gimaneho niining motorsiklo hangtod nga nabangga kini sa gutter sa maong taytayan.

Gumikan sa kusog nga impact sa maong pagbangga ang mga biktima uban sa giluwanan nilang motorsiklo ang nabunal ngadto sa sementadong bahin sa maong taytayan nga maoy nakaingon sa grabeng kadaut sa ilang kalawasan.

Ang Emergency Rescue Unit Foundation (ERUF) sa maong dakbayan ang dali nga midala sa mga biktima ngadto sa Mactan Doctor Community Hospital sa maong dakbayan apan si Pilapil ang gideklarar sa mga doktor nga patay na kining nahidangat sa maong tambalanan.