Kini nunot sa pagtumaw na sa mga protesta ug reklamo gikan sa mga contingents samtang namatikdan nga ang grupo nga mopili sa mga mananaug mao ra gihapon nga mga tawo sa niaging tuig.
Atol sa 888 News Forum sa Marco Polo Plaza kagahapon, niuyon si Bise-Mayor Michael Rama sa maong obserbasyon.
"That's a good observation," nagkanayun si Rama kinsa maoy chairman sa Sinulog Foundation.
Matud pa ni Rama nga iyang ipadangat atol sa ilang planning session ang maong isyu aron mahimo ang posibling kausaban sa sunod tuig.
Gipasabot ni Rama nga ang mga naglangkub sa board of judges karong tuiga ingon man sa nangaging katuigan, dunay tagsatagsa ka abilidad nga mohaum sa ilang pilion sama sa desinyo sa props ug kagamitan sa mga contingents, pag-arte ingon man ang mga higante, tawo-tawo ug floats.
Ang gisaligan sa pagpili sa maayong mosayaw mao ang gikan sa usa ka pundok sa mga performers sa Manila.
"With regards to dancing contingents, we always make it a point that they all coming from Manila," sumala pa ni Rama. Apan wala gisalikway ni Rama ang posibilidad sa pag-ilis sa mga sakop sa board of judges gumikan sa pagsubang karon sa mga batan-ong artista ug mga designers nga gitouhang andam modawat sa tahas.
Matud pa ni Rama nga dili sayun ang mahimong sakop sa board of judges sanglit kinahanglan man nga naa sa trabaho sa pagsugod hangtud mahuman ang kalihukan.
"There is a need to look into that. I will be bringing that," nidugang si Rama.
Usa sa nakahimong kontrobersiya sa naiging Sinulog Gand Parade mao ang pagbawi sa korona sa Sugbuanon nga Festival Queen nga si Dyzsa Jagna sa Southwestern University contingent gumikan sa wala niya pagsayaw sa street dancing niadtong Domingo ug ang nihulip kaniya mao ang iyang first runner-up nga si Rosejean Tiunayan sa Karasikas Performing Arts Guild sa Eastern Samar.