Libreng tubig ilimnon gibutang sa MCWD

Adunay 21 ka mga sentrong imnanan og tubig nga libre alang sa publiko nga mosaksi sa Kapistahan sa Sinulog karong adlawa, matud pa ni Terry Andaya tigpamaba sa Metropolitan Cebu Water District.

Matud pa ni Andaya nga kini maoy libreng pangalagad sa MCWD ngadto sa katawhan agig halad pasalamat nila sa mga kalampusan nga ilang nakab-ot sa pangalagad og tubig.

Kining tinuig nga pagpanghatag og libreng tubig nga mainom sa MCWD sa adlaw sa Sinulog, nagsugod niadtong 1980, sa dihang gilusad kining Sinulog Festival dinhi sa Sugbu, matud pa ni Andaya.

Matud pa niya nga pabantayan kini nila sa 55 ka mga kawani aron maatiman pag-ayo ang publiko nga magkinahanglan og tubig gumikan sa kauhaw.

Anha gyud ibutang sa daplin sa karsada nga maoy rota sa Mardi Gras nga ipahigayon sa mga mananayaw sa Sinulog ang mga ginalong tubig aron kahatagan dayon ang mga uhawong mamistahay.

Sa dalan P. del Rosario, anha kini ibutang sa mga eskina sa Junquera ug Don Pedro Cui, sa New Imus road anha usab kini ibutang sa iyang mga eskina sa atbang sa DepEd, Lorega St., ug San Miguel St.

Sa Mango Avenue, anha usab kini sa iyang mga eskina sa Ayala Access road, San Jose Extension ug atbang sa USC Boys High School may Mango Avenue atbang sa Fooda Savers Mart, National Book Store, Jollibee Mango ug sa Fuente Cirle.

Sa Osmeña Boulevard naa kini atubangan sa Silver Dollar Bar, Nurses Home, CAP Building, Harrison Plaza, Banco de Oro, Benz Pension ug Camp Sergio Osmeña canteen.

May ibutang usab sa eskina Osmeña Boulevard ug D. Jakosalem ug sa Magallanes ug P. Burgos nga mga eskina, matud pa ni Andaya.