Duha ka bata nangawagtang

Duha ka bata ang kompirmadong nawagtang makadiyot sa dihang nagpadayon ang prosesyon sa Batang Balaan diin liboan ka mga deboto ang mikuyog niini dala usab ang ilang rebolto nga ilang isayawsayaw kun moagi na ang Sr. Santo Niño sa ilang tungod.

Apan ang duha ka bata nahi-uli na usab sa ilang ginikanan human ang nakakita niini mi-turn over ngadto sa dalangpanan diha dapit sa P. Burgos St. diin naay mga sakop sa lay minister ang nagsigi og pahimangno gamit ang mikropono.

Usa sa inahan sa bata nga si Liza Brizo nga naabtan pa sa Banat News nga nakig-istorya sa nawagtang nga anak miingon nga wala niya mabantayi ang iyang anak nga si John Winly Brizo, 5 anyos nga nawagtang na kini sa dihang naglakaw kini sila diha dapit sa tunghaan sa University of the Visayas.

Dako ang pasalamat ni Liza nga nakit-an ang iyang anak tungod kay wala siya kabalo kun unsay angay niining buhaton tungod usab sa kadaghang mga tawo nga misaksi o mikuyog sa prosesyon. Samtang ang laing bata nakuha ra dayon sa inahan ug wala na kakuhai og pangalan.