Si Police Regional Office 7 director, Chief Supt. Silverio Alarcio, Jr. mitug-an sa Banat News nga bisan pa man sa nahitabo kang PO1 Karesh Valenzuela, hatagan gihapon kini og pasidungog nga medalya.
Kini tungod sa pagserbisyo niini sa milabay'ng Asean Summit diin usa siya sa 50 ka mga route security nga gikan sa Rehiyon 6 sukad pa niadtong milabay'ng tuig.
Matud pang Alarcio posibleng mahatagan si Valenzuela og Medalya ng Kasanayan o ba kaha Medalya ng Papuri. Niadtong natapos ang summit gipahibalo ni PNP Chief Oscar Calderon nga hatagan ang tanang polis nga mitabang sa summit security og medalya.
Gawas sa medalya hatagan sa PRO7 og tanang suportang pinansyal aron paghipos sa patay'ng lawas ni Valenzuela ingon man ang pagpadala niini ngadto sa Iloilo.
"Aayusin natin lahat kasali na duon yung burol, dadalhin natin siya sa kampo (PRO7) para sa funeral service," asoy pang Alarcio.
Samtang gidugang ni Alarcio nga iyang ipasusi kung unsay hinungdan sa insidente, apan dunay mga pagdudang posibleng gimingaw na kini nga makauli sa ilang lugar.
Si Valenzuela usa ka anak og abogado ug koronel sa National Police Commission sa Iloilo ug gikatahong nag-inusarang anak sa mga Valenzuela.
Sumala pa sa iyang mga classmate hilumon kini apan malipayon nga babaye.
Si Alarcio mipasabot nga kabahin gyud sa kinabuhi sa usa ka polis ang malayo sa ilang mga pamilya.
"That's part of our life as a policeman na minsan nadedestino ka sa malayo, saka we allowed them naman to go home eh, but we are looking into it, how come na dumating sa ganyan ang nangyari," asoy pang Alarcio.
Si Valenzuela kabahin sa mga polis nga gipabantay sa luyong bahin sa Basilica del Sto. Niño kagahapon.