Policewoman 'hikog sa Basilica

Patay ang usa ka policewoman kinsa gituohang nagpusil sa iyang ulo sulod sa kasilyas sa La Fortuna Bakeshop sa luyong bahin sa Basilica del Sto. Niño atol usab sa pagdunggo sa Balaanong Pamilya diha sa Pier Uno gikan sa fluvial parade kagahapon sa buntag.

Ang gituohang naghikog giilang si PO1 Karesh Valenzuela, 26, taga Dumarao, Capiz kinsa kabahin sa 50 ka polis nga augmentation force gikan sa Rehiyon 6 alang sa Asean Summit ug giapil na usab ang Sinulog.

Sumala pa sa dining crew sa maong bakery nga si Christopher Ausa,18, sa pakighinabi sa Banat News kagahapon nga nakit-an niya si Valenzuela nga nagbarog-barog diha sa gawas sa kasilyas ug taud-taud misulod kini.

Si Ausa kasamtangang naghugas og plato niadtong tungura diha tupad sa pultahan sa kasilyas ug nakugang nalang dihang usa ka buto sa armas ang mipaka gikan sa sulod.

Sa iyang paglili nakit-an na niyang nagkadugo na si Valenzuela diha sa ulo nga naglingkod sa inidoro ug nagsandig sa bungbong.

"Nagsandig na siya sa bungbong, nagkadugo, ako untang tabangon unya naa may tawong niingon nga di lang hilabtan," matud pang Ausa kinsa mitawag na lang sa polis.

Si Arlindo Murillo, usa sa mga Parish Security Group nga nadestino mismo diha tupad sa maong bakery mitug-an sa Banat News nga nagtuo siyang bomba ang miulbo tungod kay naglumba og panggawas ang tawong nangaon diha sa sulod.

Matud pa niya paglili niya nga buhi pa si Valenzuela maong dali niyang gipahibalo ang medical team sa mga tinun-an aron pagtabang sa biktima.

Si Ismael Roy Magno, usa ka 4th year nga tinun-an sa nursing sa University of the Visayas kinsa maoy usa sa mga mitabang sa biktima mitug-an sa Banat News nga nagginhawa pa si Valenzuela ug gi-apply ang pressure sa samad sa ulo niini aron mohunong ang pagdugo.

Ang patrol car na lang sa Mobile Patrol Group ang ilang gikargahan tungod kay wala dayon makaabot ang ambulansya ug gidala kini sa Cebu City Medical Center.

Si PO1 Arnel Leces, kinsa maoy labing ulahing gikatabi ni Valenzuela dihang gihinabi sa Banat News ug gipahibalo sa nahitabo, daw wala dayon makadawat sanglit miinsister pa kini nga igo lang nakuyapan ang iyang amiga.

Si Leces pa usab ang mibadlong kang Valenzuela samtang midagkot kini og sigarilyo tungod kay makahubak kini ug duna pa silay tiwasunon nga training pagbalik nila sa Iloilo.

"Bago pa lang kami nag-usap, ginanito ko pa nga siya sa akin (gimustra niya kung giunsa niya paghalog paduol ang biktima) sabi ko, classmate kumusta ka na miss na miss na kita eh, halos halikan ko na nga siya," asoy pang Leces kinsa kauban ni PO1 Reneil Quirante niadtong tungura nga mi-check sa ilang attendance.

Ang gwardiyang si Jonathan Quizeo sa pakighinabi mitug-an usab nga nabantayan niya kining mipaso-paso diha sa pultahan ug dayon nananghid kung duna bay kasilyas sa sulod, human niya gitubag midiretso na kini.

Samtang si PO1 Rhumyla Manguilimotan nga classmate usab ni Valenzuela mitug-an sa Banat News diha sa emergency room sa CCMC nga hilumon apan malipayon ang biktima.

Niadtong Enero 7, ulahi niyang nadunggan nga mihisgut si Valenzuela nga gikapoy na kini sa ilang trabaho, ang mga polis sa PRO6 naapil sa route security sa Asean Summit apan silang mga babaye sagad maoy tighatud og pagkaon sa ilang mga kauban sa dalan.

Matud pang Manguilimotan nakit-an lang niyang naguol si Valenzuela niadtong Nobiyembre dihang nakadawat kinig tawag gikan sa Iloilo nga nasulod sa ICU sa hospital ang inahan niini.

Ang hepe sa Homicide Section nga si Inspector Mario Monilar di pa makasulti kung naghikog ba gyud ang biktima apan buot nilang ipailawom kini sa paraffin test ug otopsiya ang lawas niini.

Gisuwayan unta pagtabang sa mga mananambal si Valenzuela apan pagkaalas 11:07 nakabsan gyud kini sa kinabuhi diha sa emergency room sa CCMC.