Gipahibalo ni Mayor Tomas Osmeña nga gawas sa mga VIPs gipaabot usab sa mayor nga daghang mga politiko ilabi na kadtong buot mokandidato pagka-senador sa eleksiyon karong Mayo ang mopahimulos sa higayon pinaagi sa pagsaksi sa Sinulog.
Apan giklaro nang daan sa mayor nga wala silay gipanghatag nga imbitasyon ngadto sa mga VIPs ug sa mga politiko apan libre kini kun gustong mosaksi sa tinuig nga Sinulog Mardi gras.
Gitug-an sa mayor nga pagkakaron bugtong si San Juan Mayor JV Ejercito lang ang nakig-komunikasyon kaniya ug nakigtakda og schedule aron makigkita kaniya karong Sinulog.
Si Ejercito una nang mipadayag og interes nga mokandidato pagka senador sa eleksiyon karong Mayo.
Gawas niini, gipahibalo sab ni Osmeña nga duna pay dili mominos 10 ka mga ambassador sa nasud sa Japan nga nagpabilin gihapon dinhi sa dakbayan bisan og nahuman na ang Asean Summit tungod kay gustong mosaksi sa Sinulog.
Gipasabot sa mayor nga walay gipili ang iyang himuon nga pag-abi- abi sa mga bisita ma-politiko man o dili nga motambong sa Sinulog karong Domingo tungod kay igo lang niyang ipakita ang maayong pamatasan aron madasig pagbalik- balik og bakasyon dinhi sa dakbayan ang mga bisita.