Tinuod nga Wonder Boy mipatim-aw

Personal nga gipakigkitaan sa orihinal nga Koko Boy the Wonder Boy ang suspek sa illegal recruitment nga nadakpan sa mga sakop sa Criminal Investigation and Detection Group 7 diha sa maong buhatan kagahapon aron limpyuhan ang iyang pangalan kagahapon sa buntag.

Si Audie Nico Pacaña Dagaraga, 23, nga taga Isidra Village sa Tisa ning dakbayan kinsa maoy orihinal nga Wonder Boy ug nabantog nga faith healer kaniadto inubanan sa iyang iyaan ug uyoang si PO3 Jeoffrey Diola sa Theft and Robbery Section miadto sa CIDG7 aron paglimpyo sa iyang pangalan.

Kini human migawas ang iyang bansagon sa mga balita nga gigamit sa usa usab ka faith healer nga si Ronald Lalican Waskin, 27, taga sitioTrese, Lunas sa lungsod sa Asturias.

Si Waskin unang nangangkon nga siya si Koko Boy the Wonder Boy ug nanambal na kaniadto ug mao usab ang iyang pagpaila ngadto sa mga nabiktima niya sa illegal recruitment nga siya ang nabantog nga mananambal.

Si PO3 Diola nga uyoan ni Koko Boy mitug-an sa Banat News nga naukay ang mga residente sa Tisa tungod sa pagguwa sa maong balita hinungdan nga iyang giadto ang pag-umangkon sa ilang balay aron kuyogan kini sa buhatan sa CIDG7.

Si Wonder Boy nga gihinabi usab sa Banat News kagahapon nagkanayon nga wala siya magbaton og kasuko ngadto kang Waskin ug ang iya lang nga malimpyuhan ang iyang pangalan.

"Wala lang, gi-clear ra nako ang akong pangalan, ako siyang giatubang unya nihimakak ra man siya nga gigamit niya akong pangalan, ang ako lang malimpyo lang akong pangalan, OK na," sumala pang Koko Boy.

Si Koko Boy bag-ohay pang mitapos og kursong Bachelor of Science in Industrial Engineering sa usa sa mga unibersidad dinhi sa Sugbu ug kasamtangan karong nagnegosyo.

Wala na usab siya manambal sukad magsugod og tungha sa kolehiyo tungod usab sa kalisod sa maong kurso. Miangkon siya nga niadtong nagsugod pa siya og panambal niadtong naa pa siya sa elementarya.

Matud pang Koko Boy wala niya damha nga mamahimo siyang faith healer sanglit ang una niyang natambalan kaniadto ang iyang mga uyoan ug mga iyaan ingon man mga kabanay.

Apan gumikan sa pagkatap sa mga estorya midagsa ang mga nagpatambal kaniya lakip na si Korina Sanchez sa Balitang K ug si Rep. Eduardo Gullas ug uban pang inilang mga tawo.

Giklaro usab ni Koko Boy nga wala siya moadto og laing lugar kaniadto aron lang manambal sanglit diha lang gyud sa ilang garahian sa balay ug wala siya kaniadto modawat og bayad kundili donasyon lang nga iya usab gipamalit og bundles of joy para sa mga bata matag Pasko.