18-anyos-miputol sa kinatawo

Giunay og putol sa usa ka 18 anyos nga lalaki ang iyang kinatawo gamit ang blade sulod sa ilang panimalay samtang nag-inusara kini kay gibiyaan sa inahan.

Nahitabo ang insidente sa miaging buntag didto sa Saksak, Dalaguete bukirang bahin, mga pito ka kilometro gikan sa Poblacion.

Ang kapolisan sa Dalaguete walay rekord sa blotter sa maong insidente.

Daling gidala sa mga ginikanan sa Vicente Sotto Memorial Medical Center si Jupiter Carizon, ulitawo, residente sa maong dapit ug giingong dunay deperensya sa pangisip.

Base sa rekord sa VSMMC, ang inahan miasoy nga gibilin niya si Carizon sa ilang panimalay kay iyang kuhaon sa tunghaan ang lain niyang anak.

Apan sa iyang pagbalik sa balay nakadungog siyang nangayo na og pakitabang si Carizon ug nagkadugo na ang iyang atubangan ug dihang gisusi sa inahan ang bilahan nasuta nga gipuok sa pagputol ang kinatawo niini gamit ang blade.

Dugang nasayran nga kaputol sa kinatawo ni Carizon giingong gikaon sa iro.

"Wa man na ma-blotter diri gahapon basin dili seguro na magpa-blotter kay mauwaw na pero nakadungog na mi og estorya diri bahin anang hitaboa pero ato lang huwaton ug moari ang tagtungod kay atong i-blotter," asoy ni PO3 Domino Ravanes sa dihang nahinabi sa Banat News kagahapon.

Si Carizon gioperahan sa miaging gabii sa mga mananambal sa nahisgutang tambalanan.