Dugang lima ka biktima sa illegal recruiter milutaw

Dugang lima ka mga biktima sa illegal recruiter ang mipatim-aw ngadto sa buhatan sa Criminal Investigation and Detection Group 7 human mabasa sa pamantalaan ang balita pagkadakop sa usa ka faith healer nga giingong miilad kanila.

Ang gireklamong illegal recruiter giilang si Ronald Lalican Waskin, 27, taga sitio Trese, Lunas sa Asturias kinsa nadakpan sa entrapment operation niadtong milabay'ng Huwebes sa udto diha sa Mabolo samtang midawat sa bayad sa duha ka mga biktima.

Positibong gitumbok si Waskin sa lima ka biktima nga maoy miilad kanila nga patrabahuon sa Singapore isip mga production workers niadtong milabay'ng tuig apan wala na kini mopakita human makadawat sa ilang mga bayad.

Ang mga biktima nga mipatim-aw ug nakabayad na sa ilang placement fees giilang sila si Rodelito Canggas, 23, nakahatag og P20 mil; Elsie Almaden, 25, nakabayad og P12 mil; Fe Malabon, 28, nakabayad og P20 mil; magsuong sila si Darlaine Donna Comendador ug Dauphine Comendador kinsa gipangayoan og mikabat og P65 mil.

Si Darlaine Donna nga naglungot-lungot human makakita kang Waskin diha sa karsel sa CIDG7 mitug-an sa Banat News nga gisaaran siya niini nga makatrabaho isip caregiver ngadto sa Las Vegas, sa US diha sa iyang iyaang giila niining si 'Saling' nga tua didto.

Sa tanang mga biktima si Darlaine Donna maoy dako og nahatag nga mikabat og P50 mil tungod kay sa US man kini motrabaho samtang ang iyang manghod nga si Dauphine sa Singapore ra.

Gawas sa lima duna pay laing upat ka mga biktima si Waskin nga giila sa ilang mga kaubanan nga sila si John Neri Enarle kinsa nakabayad og P17 mil; Angie Pilapil, nga nakabayad og P17 mil; Manny Almaden nakabayad og P20 mil ug Candelaria Manulat nag nakahatag na usab og P20 mil.

Nasuta usab nga si Waskin duna nay warrant of arrest nga giluwatan ni Mandaue RTC Branch 56 judge, Augustine Vestil tungod sa kasong large scale illegal recruitment nga paglapas sa Akta Republika 8042 kon Migrant and Overseas Filipino Workers Act of 1995.

Si Malabon sa pakighinabi sa Banat News nagkanayon nga nahaylo sila ni Waskin tungod kay usa sa iyang mga kaila ang nakapatambal niini ug mipaila kining siya si Koko Boy the Wonder Boy.

"Ang paila niya sa amo siya daw si Waskin nga siya si Wonder Boy katong nakatambal kang Korina Sanchez, nainterbyu man gani daw siya ni Korina, mituo sad mi," sumala pang Malabon kinsa taga Danao ug gisaaran nga makatrabaho sa Singapore niadtong milabay'ng tuig.

Si Chief Inspector Rex Derilo mitug-an nga madugangan pa ang kasong atubangon unya sa suspek ug ilabi na kun mangabot pa ang ubang mga reklamante.

Samtang usa sa mga biktima ang mipresentar og 14 ka mga passports nga gituohang iya sa mga biktima ni Waskin. Matud pa niini nakuha nila kini diha sa payag sa suspek sa Guinacot, Danao City human nila matinong sila giilad sa suspek, usa niini gipanag-iya ni Dauphine Comendador.